O presidente da RAG posa co alumnado e o profesorado
Alonso Montero salientou a satisfacción que lle produciu recibir, unha vez máis, estudantes deste instituto e lembrou a súa propia visita ao centro educativo. Segundo dixo, poucas veces sentiu unha emoción "tan grande e fonda" na capital da diáspora galega como cando escoitou cantar "O meu país" nas voces dun grupo de alumnos de curta idade do Instituto Arxentino-Galego Santiago Apóstolo.
O presidente da RAG ofreceulles unha charla sobre a función e a historia da institución, que chegou a facerse realidade en 1906, recordou, grazas a Xosé Fontenla Leal, obreiro ferrolán autodidacta que emigrou a Cuba. El foi "o primeiro talento" que, xunto a Curros Enríquez, puxo en marcha unha institución fóra de Galicia, a Asociación Iniciadora e Protectora da Academia Galega, da que "vén o alento e o pulo" que fixo posible a fundación da RAG, engadiu.
Xesús Alonso Montero e Henrique Monteagudo charlan con Andrea Ríos e Diego Martín Colombo, os profesores do Instituto Arxentino-Galego Santiago Apóstolo que acompañaron o alumnado durante a visita. Autor: RAG
A visita do alumnado, acompañado polos profesores Andrea Claudia Ríos e Diego Martín Colombo, concluíu cun intercambio de agasallos. Xesús Alonso Montero recibiu de mans da alumna Rocío Busca unha placa co lema Dúas beiras unidas para sempre e os estudantes puideron levar como recordo os discursos de ingreso na Academia de Xosé Neira Vilas, A cultura galega en Buenos Aires: 1950-1960, e do protagonista do Día das Letras Galegas de 2016, Manuel María, titulado A Terra Chá: poesía e paisaxe; así como Luís Seoane. Vida e obra literaria, de Marino Dónega, e Presencia de Castelao na Academia. Textos inéditos e outras páxinas.
Os mozos e mozas tamén puideron coñecer na súa visita á rúa Tabernas, 11 a Casa-Museo Emilia Pardo Bazán, ubicada na primeira planta do inmoble.
Rocío Busca entregoulle a Xesús Alonso Montero, en nome de todos os seus compañeiros, unha placa co lema Dúas beiras unidas para sempre
