No texto, escrito en Vilalba entre o 18 e o 19 de xuño de 1918, Porteiro Garea explica as razóns da falta de apoio da maioría dos industriais e comerciantes á causa das Irmandades e anima a que ese baleiro o cubran os galegos establecidos en América, "no actuando de nodrizas nuestras, sino encargándose de apoyar el movimiento en el orden moral y en el económico en la medida que crean conveniente, con organizaciones autónomas para esos fines". Entre os obxectivos máis urxentes desa axuda, o político compostelán salienta a creación dun instituto de estudos galegos.

O folleto preséntase como a resposta á petición que recibiu Porteiro Garea de redactar un traballo sobre o rexionalismo galego para a súa difusión entre a comunidade galega en América. O autor salienta que non quere dela que traia "un céntimo a nuestra manos", senón que ansía que promova a constitución de organizacións rexionalistas de emigrados nas "Repúblicas americanas" que ordenen os seus fondos e que os dediquen "a la labor que juzguen más eficaz".

A sección as Irmandades da Fala nos fondos da Academia permite tamén acceder ao discurso que Porteiro Garea pronunciou na xuntanza fundacional das Irmandades da Fala de Santiago de Compostela.