Henrique Monteagudo acudiu á reunión acompañado polos demais membros da comisión executiva da RAG, a secretaria, Ana Boullón; a tesoureira, María López Sández; a arquiveira bibliotecaria, María Dolores Sánchez Palomino; e o vicesecretario, Lourenzo Fernández Prieto. Por parte do BNG acompañaron a Ana Pontón as deputadas Mercedes Queixas Zas e Iria Taibo.
A nova executiva da RAG, á fronte da institución dende o pasado mes de abril, continuou con Ana Pontón a rolda de encontros institucionais iniciada o pasado luns coa entrevista mantida en San Caetano co presidente da Xunta de Galicia, Alfonso Rueda. O diálogo de cara á consecución dun pacto pola lingua e a proxección do galego tamén nas institucións do Estado e de Europa foron de novo dous dos temas centrais da conversa.
A executiva presentoulle ao Grupo do Bloque a proposta de creación dunha fundación pro-Academia que aglutine apoios de distintos axentes sociais para a promoción das actividades da institución e ambas as partes coincidiron na necesidade de que se mellore en calquera caso a dotación orzamentaria que a RAG recibe tanto por parte do Goberno galego coma do estatal.
Canto aos proxectos máis inmediatos nos que está a traballar a Academia en relación coa lingua, Henrique Monteagudo lembrou que xa está rematada a revisión do Nomenclátor de Galicia, que a RAG lle entregará en breve ao Goberno autonómico; e que na primeira metade do novo mandato se prevé presentar o Dicionario castelán-galego, a Gramática da lingua galega ou o Dicionario de apelidos.
