Vista das instalacións da Cidade da Cultura

Segundo este acordo, a Fundación comprométese a cederlle a título gratuíto á Real Academia Galega por un período de dez anos, o uso do espazo necesario no edificio da Biblioteca e Arquivo de Galicia para instalar o persoal destinado aos seminarios de Lexicografía, Terminoloxía, Sociolingüística e Onomástica, persoal residente en Santiago de Compostela que comezara a desenvolver as súa tarefas en locais alugados na capital de Galicia. Grazas ao mencionado acordo, a partir dos comezos do vindeiro ano 2014 os técnicos dos devanditos seminarios levarán a cabo o seu traballo na Cidade da Cultura, aproveitando tamén os fondos e infraestruturas alí existentes. Este acordo facilitará o traballo en equipo dos traballadores da Acdemia e suporá unha importante mellora nas súas condicións laborais.

Asemade, a Real Academia Galega e a Xunta de Galicia subscribirán outro concerto que permitirá a modernización da xestión do catálogo da Biblioteca e do Arquivo da RAG, mediante a cesión gratuíta de licencias informáticas e a incorporación posterior dese catálogo ao Portal da Rede de Bibliotecas de Galicia.

Estes convenios, que serán asinados proximamente polo Presidente da Real Academia Galega e o Conselleiro de Cultura, Educación e Ordenación Universitaria, enmárcanse na tradicional liña de colaboración institucional que a Real Academia Galega vén mantendo coa Xunta de Galicia, e que resulta de fundamental importancia para que a Real Academia Galega cumpra axeitadamente as funcións que ten asignadas.