Luz Pozo Garza

Adeus a Xohana

Luz Pozo Garza

27/11/2017

pasado 12 de setembro finaba en Vigo a escritora e académica Xohana Torres. A tamén membro de número RAG e poeta Luz Pozo Garza escribiu estes sentidos versos na súa memoria.

 Adeus a Xohana
polo mar da morte

1

Querías navegar. Nin outra cousa...
O mar no corazón. e o mar ao lonxe

e as aves a bater no tempo ileso

namentras a estribor daquesta vida
te declarabas émula
da primeira almiranta
dunha historia:

"Eu tamén navegar...",
gritas aos catro ventos

rachar coa submisión
códigos obsoletos

sofismas e secuencias
solagadas...

conxurar testamentos
exorcizar mapoulas
antigos paradoxos
sen mesura
aquela maxia...


2

Sí. aquela maxia pode ser
de todos...

Eu tamén navegar
aos catro ventos...

entregada ás mareas
coreabas
polas rúas e as prazas
da cidade...

e os ollos
de par en par ávidos. libres
polas costas do mar océano aberto...


3

- Ai… Ai… mas. as Fisterras nosas
as soñadas Fisterras
as nosas consagradas
as tan amadas terras...

vémolas na distancia dun corazón
lonxano moi ferido!

- Daquela retornamos como tornara Ulises
a reinar e a morrer no lugar consagrado...

ao primeiro esplendor da nosa historia

de puro amor
de pura idolatría...

Luz Pozo Garza
Membro de número da Academia


Axenda de actos Ver todos
Mércores 20 de decembro de 2017 / 19:30 h
Acto literario e musical co gallo do 110 aniversario da estrea do Himno

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar