Chus Pato retrata o talento da nova xeración poética

Pertencen a unha xeración que o ten moi difícil, composta en gran parte por "corpos para a caza", pero cun "enorme talento". Tomando prestado un verso de Oriana Méndez, a poeta e académica electa Chus Pato referiuse así á nova xeración de poetas da literatura galega no retrato que dela trazou na conferencia que impartiu esta mañá ante o alumnado dos Cursos Galego sen fronteiras. Centrouse na escrita de catro mozos e catro mozas nados entre 1980 e 1996, pero advertiu que "hai máis" herdeiras e herdeiros "dunha tradición poética moi poderosa" que son motivo de "orgullo infinito". Unha xeración que, como o conxunto das letras galegas, merece unha política cultural diferente, capaz de proxectar as súas creacións cara ao exterior, valorou.

Chus Pato nun momento da súa intervención. Fotos: RAG


Chus Pato é talvez a mellor poeta das letras galegas contemporáneas, recordou o académico Xosé Luís Regueira, encargado de presentala. Para a maior parte dos poetas novos, é "case unha figura reverencial", pero nas cerca de dúas horas que a escritora ourensá compartiu hoxe co alumnado dos Cursos de lingua e cultura galegas o protagonismo non foi para os seus versos, senón para os de oito creadoras e creadores que forman parte da poesía máis nova do país: Silvia Penas (1980), Oriana Méndez (1984), Francisco Cortegoso (1985-2016), Alba Cid (1989), Alicia Fernández (1987), Gonzalo Hermo (1987), Antón Blanco Casás (1996), Jesús Castro (1992).


Tras a conferencia produciuse un coloquio sobre a nova poesía galega


A intervención arrincou coa proxección de "Miña nai", de Silvia Penas, a autora que serviu tamén para pechar o repaso xeracional con outro vídeo de Cintaadhesiva. Deseguido, Chus Pato centrouse nun dos poemas d'O que precede á caída é branco, libro de Oriana Méndez, distinguido co XVII premio de poesía do Concello de Carral (2014), cun poderoso comezo, "O noso nome é / corpos para a caza", que inspirou o título da conferencia: Corpos para a caza, retrato dunha xeración. "Eles/elas, sen dúbida, son humanos sometidos a un traballo que os toma por bestas, podendo por esta razón ser sacrificados como calquera outro animal", analizou Chus Pato. Aínda que o poema parte "dunha posición moi extrema", pode servir para se referir a gran parte dunha xeración que o ten "moi complicado, moi difícil", que se ve obrigada a emigrar, pero que no caso da poesía galega esta formada por persoas cunha importante madurez creativa e un "talento enorme" .

De Francisco Cortegoso, a académica electa escolleu o poema "Dedicatoria", de Memorial e danza -gañador do XXVI premio nacional de poesía Xosemaría Pérez Pallaré (2013)-, obra dedicada á respiración. "Esta respiración á que vai dedicada o libro é sen dúbida a linguaxe. Pero non unha linguaxe calquera, se non a lingua, o idioma, da poesía", explicou. O percorrido xeracional continuou con outro vídeo-poema de Alba Cid e a serie de poemas de Alicia Fernández titulada "Breviario", publicada na antoloxía No seu despregar (2016). Poesía "case social", pero dunha maneira moi persoal , e tamén "moi directamente feminista", expresou.

Unha poesía de amor de Gonzalo Hermo publicada en Celebración, obra gañadora do "Premio Nacional de Poesía Joven Miguel Hernández 2015"; versos d'A oseira, de Antón Blanco Casás, e un vídeo-poema de Jesús Castro completaron o retrato xeracional.

Xunto ao alumnado, a sesión tamén foi seguida por Alba Cid e Antón Blanco Casás, que participaron no coloquio que se estableceu tras a conferencia.


Chus Pato posa xunto a Alba Cid e Antón Blanco ao termo da conferencia
Dicionario
Axenda de actos Ver todos
Xoves 14 de decembro de 2017 / 20:00 h
'Eduardo Pondal, poeta na Coruña', conferencia de Manuel Ferreiro

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar