A RAG inicia un ciclo sobre as Irmandades da Fala cunha conferencia de Xosé Ramón Barreiro

A Real Academia Galega propón para mañá, 16 de xuño, unha viaxe ao tempo histórico das Irmandades da Fala da man do historiador e membro de número da institución Xosé Ramón Barreiro Fernández. O experto pronunciará a conferencia inaugural do ciclo de mesas de debate No tempo das Irmandades: fala, escrita e prelos, organizado pola RAG dentro da súa programación de conmemoración dos cen anos da fundación dun movemento que marcou un novo rexurdimento para a cultura galega e unha nova etapa do galeguismo político. A entrada é libre. O ciclo profundará ao longo do ano 2016 nas producións literaria, xornalística e editorial galegas desenvolvidas polas Irmandades da Fala, que experimentaron grazas a elas un importante avance.
Xosé Ramón Barreiro
Xosé Ramón Barreiro. Autor: Xosé Castro

Xosé Ramón Barreiro Fernández impartirá este xoves a conferencia de apertura, baixo o título O marco histórico das Irmandades da Fala, a partir das 20 horas no salón de actos da Real Academia Galega, na rúa Tabernas, 11 da Coruña. O presidente da RAG, Xesús Alonso Montero, e o secretario xeral de Política Lingüística, Valentín García, presentarán antes o ciclo, que conta coa colaboración da Xunta de Galicia. O programa pecharase no mes de decembro tamén na RAG despois de percorrer as sete principais cidades do país, seguindo a ruta marcada pola itinerancia da exposición Saúde e Terra, irmá(n)s!, e Viveiro. Esta completa mostra sobre as Irmandades, organizada pola Academia, a Deputación da Coruña e o Museo do Pobo Galego, pode verse durante o mes de xuño na Fundación Barrié da Coruña.

Catro das nove mesas de debate profundarán no ensaio e a oratoria, o teatro, a narrativa e a poesía que cultivaron as Irmandades, xéneros aos que a RAG lles dedicará cadansúa antoloxía, que serán editadas ao longo do segundo semestre de 2016. O mundo da ilustración, as iniciativas xornalísticas e editoriais deste movemento, as súas ideas lingüísticas e os seus protagonistas centrarán as demais mesas de debate, que contarán coa participación de máis dunha trintena de expertos e expertas, parte deles membros da Academia.

Dicionario

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 376

Boletín da Real Academia Galega
nº 376

Descargar

Cadernos de Lingua
nº 35

Descargar