A Academia colabora no programa que achega a súa toponimia aos concellos

A Real Academia Galega colabora con "Toponimízate. Falámosche dos nomes da túa terra", un novo programa da Rede de Dinamización Lingüística da Xunta de Galicia que pretende divulgar a toponimia entre a cidadanía e concienciar sobre a importancia da implicación colectiva para a preservación deste patrimonio inmaterial. O filólogo Vicente Feijoo, especialista nesta materia e membro do Seminario de Onomástica da Real Academia Galega, está a impartir as charlas programadas neste marco, que entre decembro e xaneiro chegarán a quince concellos.

Vicente Feijoo impartindo unha das charlas do programa Toponimízate no Carballiño


As conferencias, dirixidas a técnicos municipais, comunidades de montes, asociacións culturais e veciñais, escolares e calquera persoa interesada no tema, pretenden dar a coñecer a riqueza toponímica de Galicia e como pode a xente participar na recuperación dos microtopónimos da súa contorna. O público aprende así as diferenzas entre microtoponimia e macrotoponimia, a importancia e a riqueza da toponimia como patrimonio inmaterial, as razóns polas que Galicia é tan rica en nomes de vales, montes, camiños, regueiros ou fontes ou as causas polas que se está a perder a microtoponimia. Co obxectivo de frear este problema, outro aspecto no que se incide é a importancia e necesidade da xeorreferenciación e xeolocalización destes topónimos.

Para facilitar este labor, estase a desenvolver unha aplicación concibida para que os propios veciños e veciñas poidan colaborar no rexistro da microtoponimia pendente de recoller, unha ferramenta que tamén se presenta nestes encontros. Nos concellos onde xa se rexistrou microtoponimia, os asistentes aprenden tamén a visualizar os nomes das terras e os usos que permite o buscador de topónimos, de grande utilidade tanto para a veciñanza como para as distintas administracións e a investigación nas ciencias humanas.

As charlas conclúen cunha explicación do significado do nome de cada concello e das parroquias, e dando resposta ás preguntas sobre que significan moitos microtopónimos de cada lugar.

Vindeiros encontros
As charlas chegarán durante o mes de decembro aos concellos de Arteixo, A Coruña, Boqueixón, Lousame, Melide, Outes, Vedra, Palas de Rei, Sober, O Carballiño, Ourense, Cangas, O Grove e Silleda, e en xaneiro, a Viveiro. Esta mesma tarde, ás 19:30 horas, a Casa da Xuventude de Silleda acollerá unha nova sesión. O vindeiro mércores, 27 de decembro, desenvolverase outra no Centro Ágora da Coruña a partir das 18 horas e o xoves 28, haberá dobre sesión: ás 12 horas, na Casa da Cultura de Palas de Reis e ás 20 horas, na Sala das Cunchas da Casa do Concello do Grove. O encontro previsto en Viveiro terá lugar o 12 de xaneiro ás 18:30 horas na sala multiusos do pazo municipal.

Dicionario
Axenda de actos Ver todos
Venres 19 de xaneiro de 2018 / 19:30 h
Celebración dos 40 anos da revista 'Encrucillada'

Novas da Academia

Subscríbete

Normas ortográficas e morfolóxicas do idioma galego

Descargar

Vocabulario Ortográfico da Lingua Galega

Consultar

Hemeroteca Virtual Galicia nas páxinas dos seus xornais.

IR

Cuberta do Boletín 377

Boletín da Real Academia Galega
nº 377

Descargar

Cadernos de Lingua
nº 35

Descargar