A POESÍA DE ELADIO RODRÍGUEZ GONZÁLEZ Olivia Rodríguez González
Universidade da Coruña
Lendo atentamente a poesía de don Eladio, revélasenos o poeta de carne e óso mellor que nas esvaídas fotos de época. Aparece cunha atractiva personalidade, unha mestura de grandiosa vaidade de poeta e extremada humildade como intelectual, raiana no complexo de inferioridade do que se sabe autodidacta por máis que a súa sabedoría ascenda por riba da media. Un dos seus últimos poemas, o epílogo onde como autor de Oraciós campesiñas fai o seu autorretrato, e que el titula ?Sinceiridade?, é algo máis que pura retórica: confesa o seu apoucamento, que o obriga a quedar con ansias místicas non realizadas a prol dos demais: ?Son cobizos do lonxe, porque eu non sei mirar máis que pr'o preto; son degoros do alto, do inmorrente e eterno a onde soben os que teñen as aas que eu non teño (...) Deixádeme andar soio comigo mesmo, para que non se me descubran as probezas dos meus pensamentos? (?Sinceiridade?, OC: 242). A poesía de don Eladio é producto dunha rara capacidade de versificación debida ó dominio do ritmo e ó seu elevado sentido musical. O poeta manexa a métrica culta da tradición clásica e romántica, e sabe tamén trasladar con fidelidade os ritmos populares. Véxase como exemplo disto último unha breve mostra de ritmo ternario con xogo de rimas agudas e proparoxítonas: ?Colle un rapás o seu pínfano, tócanse as cónchegas, bátense as maus, yentre aturuxos e cántigas bríncase e báilase sin acougar? (?No muiño?, F :66).
81
Nº 362