BIBLIOTECAS NA BIBLIOTECA DA RAG Mercedes FernándezCouto Tella
Durante este ano estase a celebrar o Centenario da Real Academia Galega e xa que logo pode ser un bo momento para reivindicar o senlleiro papel que a Biblioteca representou, e está chamada a representar, na vida da RAG. Pensemos que case poderiamos dicir que a Biblioteca se adianta ao nacemento da propia Academia, xa que o primeiro asento do libro de rexistro da Biblioteca leva a data de 19 de decembro de 1905. A Academia valorou sempre a importancia da Biblioteca que foi, ao longo da súa historia, a sección receptora de boa parte dos escasos recursos que tiña. E o mellor xeito de reivindicar unha biblioteca é presentarlles aos potenciais usuarios os fondos que conserva, co gallo de difundilos e incentivar a súa consulta. No momento de elixir desvelar algún aspecto pouco coñecido da biblioteca fíxose a escolla das bibliotecas particulares por varias razóns. En primeiro lugar pola importancia que teñen as bibliotecas particulares como fonte de investigación. Estas bibliotecas posúen ademais do propio valor do libro, que enriquece a Biblioteca, outro engadido que é o de ser testemuña da personalidade dos seus donos. As bibliotecas particulares constitúen un elemento que permite achegarnos ao coñecemento do proceso de formación intelectual dos seus propietarios. Achegan gran cantidade de información sobre os gustos, afeccións, inquedanzas, ideoloxía e influencias culturais dos seus propietarios e son unha fonte de gran valor para os estudosos destes persoeiros. En segundo lugar, pola necesidade de termos identificadas as coleccións antes de que unha remodelación da biblioteca ou a modificación das propias coleccións faga que se dilúan no todo da Biblioteca e se perda a súa singularidade. Finalmente, polo peso que as bibliotecas particulares teñen na Biblioteca da RAG, na que constitúen unha parte máis que relevante do total de fondos. Antes de empezar, cómpre clarexar que para este traballo se define a biblioteca particular como unha colección de fondos bibliográficos reunidos por unha persoa física ou xurídica ao longo da súa existencia, e incorporada na súa totalidade ou nunha gran parte á Biblioteca da RAG. As doazóns á biblioteca de libros soltos feitas ao longo do tempo por unha mesma persoa, aínda que acaden gran cantidade de libros, non teñen para nós a consideración de biblioteca particular. O obxectivo final deste estudo é presentar aos investigadores as bibliotecas particulares existentes na Biblioteca da RAG. Cales son esas bibliotecas, como e cando entra195 Nº 367
