CRÓNICA DA REAL ACADEMIA GALEGA
1. NOVO PRESIDENTE DA REAL ACADEMIA GALEGA
O cargo de Presidente da Real Academia Galega, baleiro trala dimisión de D. Domingo GarcíaSabell o 19 de xullo de 1997, é ocupado por D. Francisco Fernández del Riego o 29 de novembro de 1997. BIOGRAFÍA DE D. FRANCISCO FERNÁNDEZ DEL RIEGO Naceu en Vilanova de Lourenzá (Lugo) en xaneiro de 1913. Fixo os primeiros estudios na súa vila natal e en Monforte de Lemos; en 1930 iniciou os estudios de Dereito na Universidade de Madrid que rematou na Universidade de Santiago xunto cos de Filosofía. Na época compostelá pertenceu á FUE e dirixiu a revista Universitarios. Ó obtela licenciatura en Dereito incorporouse á docencia universitaria como profesor auxiliar de Dereito Civil. Durante os seus anos composteláns ?é dicir, do 31 ó 36 a vocación literaria do mozo del Riego, fortemente influída polos seus ideais políticos, tomou forma predominantemente xornalística. Os artigos que baixo o enunciado xenérico de V e r b a s d e m o c i d a d e publicaba frecuentemente en El Pueblo Gallego, en A Nosa Terra y en Heraldo de Galicia eran unha das manifestacións máis vibrantes do pensamento galeguista d aqueles anos. Colaborou tamén nas revistas Nós e Alento e dirixiu temporalmente os semanarios A Nosa Terra e Ser. A súa actividade política en Galicia tivo unha primeira manifestación espontánea o 25 de xullo de 1931 mediante a publicación en Vilanova de Lourenzá dun manifesto galeguista asinado por el e por outro mozo. Ó fundarse o Partido Galeguista incorporouse ó mesmo, afiliándose ó Grupo de Santiago. Cando se constituíu a Federación de Mocedades Galeguistas, del Riego foi o primeiro Secretario Xeral, pasando a continuación ó Partido para tomar parte moi activa no labor de propaganda. Revelouse moi moi pronto como gran orador, converténdose nunha das personalidades máis activas da propaganda oral galeguista, como a través dos seus artigos xornalísticos o era igualmente da propaganda escrita. A Guerra Civil truncou todas estas actividades. A súa destrucción como profesor universitario, xunto coa prohibición de residir en Santiago, puxeron fin á súa etapa compostelá. En 1939 fixou a súa residencia en Vigo. Exerceu a docencia privada, aínda que pesaba sobre el a prohibición de ensinar. Uns anos máis tarde comezou a escribir nos xornais co alcume de Salvador de Lorenzana. En 1943 inicia contactos con algúns dos galeguistas superviventes para considerala posibilidade de reorganizalo Partido Galeguista na clandestinidade. Cando esta reorganización se leva a cabo, Fernández del Riego pasa a ser un dos principais responsables da política clandestina do galeguismo.
