O COLECCIONISMO José Manuel González Troncoso
En primeiro lugar, quero agradecer a Don Xosé Luís Méndez Ferrín que me invitase a participar nesta Mesa Redonda que pon fin ao ano dedicado a Don Xosé María Álvarez Blázquez. Agradézolle que pensase en min para achegar a miña experiencia como amante do coleccionismo e tamén como profesional dedicado ás antigüidades durante toda a miña vida. Dado o carácter deste ilustre acto, e, sobre todo, estando en presenza de tan importantes expertos sobre a vida e obra literaria de tan notable personaxe, non me corresponde a min redundar sobre estes aspectos do escritor, pois pouco ou nada podería engadir que non fose xa extensamente coñecido. Gustaríame, iso si, manifestar que me sinto moi honrado de ser concidadán seu, por ter nacido ambos nesta benquerida cidade de Tui, que enraíza tan fondamente nos seus lares aos que gozamos do privilexio de ver a luz primeira no seu seo. Tamén me congratulo de ter en común con el a paixón polo coleccionismo, aínda que a cada un de nós nos chegase por diferentes situacións persoais e profesionais. No meu caso, pódese dicir que se me transmitiu na cadea xenética, pois veño dun pai que era un gran coleccionista. O coleccionismo é unha curiosa afección que fai que as persoas interesadas por tal actividade dediquemos un tempo importante do noso día a día á busca de ?posibles tesouros?, sabendo que, nalgún lugar, nos está esperando a peza que nos falta. Por iso, ás veces, tómannos por seres un tanto diferentes da maioría. Un coleccionista é unha persoa que ?recolle? (Colectiocolectionis), como etimoloxicamente se define, e achega, a si mesmo ou a outros, retallos de Historia, actual ou pasada, vestixios de civilizacións, culturas, modas, crenzas relixiosas, tendencias políticas, etc., etc. Dalgunha maneira, o coleccionista, e en maior medida o anticuario, é unha especie de ?dicionario histórico?, xa que os vestixios, as pegadas que foron deixando os pobos a través dos tempos, son testemuños para afianzar os coñecementos sobre a Historia da Humanidade. Eu participo das dúas vertentes, xa que, amais de gozar con cada nova ?conquista?, tamén son intermediario doutros afeccionados a través da miña actividade profesional. Volvendo á figura de Álvarez Blázquez, parece ser que é a partir do ano 1950, no que rexenta a Editorial Monterrei, cando comeza a desenvolverse a súa vocación de coleccionista ávido de todo aquilo que, escrito en lingua galega, ou pertencente a calquera
145 Nº 369