MANUEL MURGUÍA
149
Este tipo de opinións seguen a ter, ó noso xuízo, unha grande actualidade. Parece que están falando non sobre a Galicia premoderna e invertebrada do XIX senón sobre a Galicia cultural dos nosos tempos, igual que as que propoñen unha rexeneración da vida académica: ?No se quería que la Universidad siguiese por juro de heredad entregada a los ineptos?, dísenos noutro momento. Murguía, o gran vertebrador do espacio cultural da época do Rexurdimento é, ó mesmo tempo, un crítico. O mesmo Murguía que se presenta ante nós como o gran fundador dunha cultura e dunha literatura é, ó mesmo tempo, un crítico da cultura, do noso medio cultural, expresando un proceso semellante ó que Freud definiría anos despois deste cun título memorable como ?malestar da cultura?. Pero é xustamente ese malestar da cultura, ese mal estar na nosa cultura o que fai a Murguía tan tremendamente atractivo nos días de hoxe, porque ese malestar, ese espírito crítico provén do mesmo home que, movido por unha gran crenza, por un inquebrantable compromiso intelectual co país e por unha gran fe, contribuíu como poucos a fundalo que debe permanecer. Pero todas estas ideas encamiñadas á fundación dunha literatura, que expresase os sinais de identidade dun pobo e que servise como arma de conquista dun porvir rexenerador, non debe levarnos a concibilas ideas literarias de Murguía como as dun estricto buscador de esencias propias, que fecha os ollos ó diálogo exterior ou o que se pode denominar ?comparatismo literario?. Todo lector que sexa quen de ler ben, ha saber comparar. Murguía como escritor, pero tamén como lector, está asolagado nas correntes estéticas europeas da época. Unha das características máis salientables do Murguía que une o crítico co lector é o grande coñecedor que era das literaturas estranxeiras. No Madrid da década dos 50 foi, posiblemente, un dos primeiros lectores da poesía de Gerard de Nerval e de Heinrich Heine, de quen inclúe unha significativa cita á fronte da semblanza da súa muller, Rosalía de Castro, en Los pre c u r s o re s. As alusións a moitos escritores europeos do XIX están presentes nas mesmas páxinas. Máis sorprendentes aínda son as alusións a Baudelaire e a Walt Whitman no prólogo a En Pro s a, sobre o que volveremos, ou as opinións sobre Hoffmann e Poe que Rosalía e Manuel Murguía se cruzan nunha carta. É dicir, Murguía é un lector atento da gran poesía do XIX, desa constelación que configura a tamén chamada poesía moderna, sobre a que emitiu xuízos máis que intere