BOLETÍN DA REAL ACADEMIA GALEGA
Eladio Rodríguez González
optación exclamativa: o desexo de oír tódolos días esa oración sen nome. A presentación das escenas realízase con estructurais nominais paralelísticas. Son suxeitos detidamente caracterizados e seguidos por puntos suspensivos, de xeito que non chega a completarse a estructura oracional. Predominan os termos sonoromusicais: cántiga, badaladas, eco, silencio, sonando, rítmica armonía, apagándose, salouco, laiándose; e os que nomean elementos da natureza: bocanoite, campos e picoutos, brétema, vales e montes, campía, sombras... Os verbos en progresión dinámica desde carreira ata a desapariciónreproducen con matices de animación a maneira de expandirse o son nesa paisaxe estática: corre, se destrenza, se envolve, vai esmorecendo..., morre. A interpretación sentida do poeta, que se lanza en exclamacións retóricas, continúa en formas de estructura nominal, equivalentes ás da descrición anterior, porque queren ser fiel traducción delas. O carácter misterioso da canción queda explicado mediante antíteses totalizadoras: terra e ceo, o preto e o lonxe. E o momento temporal no que isto sucede cobra relevancia definitiva: é a voz de misterio coa que a Natureza ?na lírica hora da emoción se dorme?. Aparecen os seres humanos, finalmente, recollendo esa canción como estímulo místico (concepto , como o do rezo, xa adiantado na primeira estrofa). Estala a emoción do eu lírico na expresión do seu desexo: non deixar de oír nunca por incapacidade ou por afastamento na urbe a canción de sagra vaguedade. Facer poesía sobre momentos ou escenas estáticas ou ralentizadas é un risco modernista que atopamos nesta composición, xunto a outros como a preferencia polo momento do luscofusco, a ausencia do ser humano na escena, a aparición de símbolos de estados de ánimo e o dominio do elemento sensorial. Ben é verdade que a herdanza posromántica, neste caso máis becqueriana que rosaliana, apréciase aínda, como se aprecia no modernismo máis afín ó de Eladio, que máis ben é o chamado posmodernismo. Este poema forma parte dun libro coordinado arredor da empresa poética de cantar á Natureza que se vive na aldea como un Templo onde todo é canción lírica, é dicir, oración. Oración é pois un termo polivalente que non significa só rezo, senón voz da natureza en comunicación divina co home, e voz e ruído do home que se transfunde co a voz do cosmos Esa oración aparece fragmentada, pois, en distintas voces, e Eladio Rodríguez vai recolléndoas con minuciosidade para formar a sinfonía completa. Unha delas é esta canción sen nome, porque é a que se forma na hora do misterio. O poeta é quen de captar esas voces e falar delas, interpretándoas. Os demais limítanse a vivilas sen decatarse nese escenario paradisíaco da vida do home no campo.
Nº 362
94