Traballos de investigación e estudo
BOLETÍN DA REAL ACADEMIA GALEGA
Noutra orde de cousas, sorprende n'Ó Apóstol Santiago a datación asignada á inventio dos restos apostólicos (vid. 2.2). En efecto, o ano 873 distánciase considerablemente das propostas máis comúns que viñan situando o achado nas primeiras dédacas do século IX, e ademais contraponse abertamente á datación da concesión do Privilexio dos Votos, pretendidamente redactado e asinado no ano 834. É posible que se trate dun erro de copia polo ano 81312, erro que quizais habería que atribuír á man redactora máis ca aos impresores do prego; doutra maneira custa entender que a era DCDXI do texto estea ben calculada en función do ano 873 e non, como sería esperable, do 813. Volvendo ao tema das fontes manexadas, cabería preguntarse a que obra ou obras se refire o autor cando fai mención deses ?papéis mais bellos? que recollen o nome de S. Fins de Lovio. Quizais o lese nalgún texto notarial ou noutro tipo de documentación antiga. A forma San Fijns de Loueo aparece recollida na Crónica de Santa María de Iria (Vasques 2001: 108), cuxo orixinal autógrafo está depositado no Arquivo Catedralicio de Santiago, pero da que se conservaron máis copias en Galicia, cando menos ata fins do XIX (Souto Cabo 2001: 3740). Consultase ou non o autor esta obra en concreto, o que parece probable é que o nome de S. Fins de Lovio proceda dalgún texto escrito en galego, sempre e cando non se deba a unha manipulación dos editores do prego. Dicimos isto porque a forma S. Fins de Lovio tamén aparece nas liñas que anteceden o xa citado fragmento da ?Memoria? publicado polo Diario de Santiago entre o 22 e o 23 de agosto de 1877, procedentes en última instancia do libro de Zepedano y Carnero (1870: 9):
La relacion mas exacta y circunstanciada de la invencion del cuerpo del Apóstol Santiago, Patron de España, se halla en el libro de la Hermandad de los Caballeros Cambeadores establecida en el siglo IX en el lugar de S. Fins de Lovio, modesta cuna de lo que después se llamó Compostela.
Mesmo se podería pensar que o parágrafo en que se localiza o nome S. Fins de Lovio (?Aquela Capela, ou hermita, era á que oxe chaman S. Felix de Solovio; anque o nome lexítimo é S. Fins de Lovio, segun os papéis mais bellos? ?2.1? ) é todo el un engadido no prego, pois formas coma oxe (fronte a tres casos de hoxe) ou o plural papéis, aínda que non raras nas fontes escritas da época, si son excepcionais no conxunto do relato (véxase máis adiante no estudo lingüístico). Antes de pasar ao seguinte apartado aínda debemos facer mención dun artigo publicado no Diario de Santiago que, baixo o título de ?¡¡¡Compostela!!!?, apareceu anónimo o 24 de xullo de 1875 (reproducímolo no ?Apéndice?, ao final do traballo). Presenta, en xeral, un contido e unha estrutura similares aos que atopamos n'Ó Apóstol Santiago, salvando algunhas pequenas diferenzas. O que nos interesa do texto é a súa parte final, en que se fai referencia á celebración do Xubileu; nela detectamos un grao de semellanza c'Ó Apóstol Santiago que non parece debido á casualidade:
247 Nº 367