MANUEL MURGUÍA
93
neamente raza, territorio, carácter ou ?espírito? e lingua, e por esta orde de importancia dada a secuencia causal que establece entre eles. E para que exista nación nada importa nin a independencia política nin a natureza do seu sistema social e político, e polo tanto, tampouco a vontade política e nacional dos seus integrantes. De aquí que reproche a Sánchez Moguel confundir ?más que a menudo el Estado con la Nación? (1889a, p. 3), ou que pense que, por riba dunhas ou doutras vontades colectivas, Alsacia e Lorena, etnicamente xermánicas, acabarán decantándose polo II Reich en canto este lles conceda autonomía (p. 23). Isto permítelle afirmar que as ?rexións? etnicamente diferenciadas, malia non teren Estado propio nin amosaren moitas veces a vontade maioritaria de telo, son en realidade ?naciones minúsculas? que ?resisten con instintiva energía el aniquilamiento que las amenaza? (p. 4). Daquela ¿que papel xoga no seu concepto de nación esa ?conciencia de sí misma? ou esa ?vida en común consciente y continuada? dos seus membros que menciona ás veces? É obvio para calquera que unha suposta nación sen Estado ou sen autonomía non conseguirá esta ou aquel sen un movemento forte de abondo que loite por ese obxectivo, para o que se precisa certo grao de conciencia nacional. Murguía, como calquera nacionalista de calquera tendencia, era moi consciente da necesidade de avivar esa conciencia, polo que a considera instrumento necesario para a realización política da nación, pero en absoluto requisito da súa existencia obxectiva. Aquí está precisamente a linde que separa os que conciben organicamente a nación dos que teñen dela un concepto liberalpolítico puro. Para os segundos, a vontade política de constituírse en nación é imprescindible para que a nación exista, pois no seu pensamento, nación equivale a instancia lexitimadora dun poder político organizado segundo os principios da representación e os dereitos fundamentais e, por extensión, o corpo social así estructurado. Polo tanto, e simplificando moito as cousas, podemos dicir que neste caso a nación é a consecuencia dun tipo de vontade política colectiva. En cambio, para os primeiros é xusto ó revés: a nación, comunidade etnohistórica, é condición previa para que poida xurdir, en circunstancias adecuadas, unha conciencia nacional e o conseguinte nacionalismo: agora a conciencia é consecuencia non necesaria da existencia da nación, e esta pode preceder en moitos séculos ás primeiras manifestacións de