204
BOLETÍN DA REAL ACADEMIA GALEGA
En definitiva, parécenos completamente inxustificado analizalo celtismo de Murguía, e en xeral do galeguismo decimonónico, como un síntoma de atraso intelectual do autor, e globalmente da intelligentsia galega. Cando o celtismo (lingüístico) comezou a divulgarse aquí, tanto en Portugal coma en Francia se manifestaba en pleno vigor, solidamente aliado co vello paradigma históricolingüístico e as concepcións asociadas a este (entre outros, a crenza de que a evolución lingüística era resultado da 'mestura' global de linguas)10, resistindo con firmeza contra o embate da nacente romanística e da nova lingüística históricocomparada, mentres que o 'semitismo' tiña cualificados adeptos en Castela, que expuñan as súas teorías perante a Real Academia Española. O que é excepcional, e merecente dunha explicación, é a persistencia do celtismo na obra de Murguía e en xeral en Galicia. Apuntamos antes, como explicación, a confusión, xeral na Europa do momento, das nocións de raza e lingua (con predominio da primeira sobre a segunda, no caso de Murguía)11. Finalmente, para rematarmos con este apartado erudito, imos salientar da introducción e notas á edición que ofreceu Murguía da ?Carta en respuesta al Rvdmo. P.M. Esteban de Terreros Sobre el Origen de la Lengua Gallega y sobre la Paleografía Española? (Murguía 1880)12, a insistencia na importancia do elemento céltico no idioma galego. Segundo Murguía, Sarmiento ?prescindió de [este] elemento esencial?, aínda que recoñece que ?la dificultad estriba en señalar taxativamente en qué proporción y hasta dónde? atinxiu tal influencia. Das notas ó texto con que arrequentou a edición, é de salientalo interese das noticias que achega para a historia externa da lingua, e concretamente para a historiografía da lingüística galega. De feito, os seus textos sobre a lingua acostuman estar salferidos de informacións valiosas sobre a 'fortuna histórica' do galego, e de apreciacións que resultan moi útiles para reconstruírla evolución do esquema de historia da lingua que se foi construíndo na segunda metade do século XIX. Deixemos isto simplemente apuntado, pois no presente traballo non nos imos deter nesta cuestión. 2. DESPEGAMENTO DO REXURDIMENTO. TEMPO DE POLÉMICAS... Sobre as polémicas públicas que acompañaron o Rexurdimento galego xa se leva escrito algo: o profesor Alonso Montero (1970: 234) chamou a atención