MANUEL MURGUÍA
151
bración semellante. Aguirre conforma, para Murguía, o tipo de poeta popular, que sintoniza coa clase obreira pero tamén cos estudiantes universitarios, e que goza dun gran recoñecemento no ámbito dun Santiago estreito, que pode chegar a apouvigalo coma a lousa dun sartego. Poeta da cidade e, ó mesmo tempo, poeta enfrontado á cidade. Aquilo que Murguía denomina o aguirrism o non é tanto un estilo ou unha escola literaria senón un xeito de comprendela cidade episcopal e universitaria, que proxecta a súa influencia á obra de Rosalía, tamén poeta contra a cidade nalgunhas das súas inesquecibles páxinas, e estou pensando no poema de En las orillas del Sar, ?Santa Escolástica?. O a g u i r r i s m o habería que entendelo como unha condición sentimental, acaso cunha enfermidade moral, e tería que ver, pois, co wertherianismo ou co que Musset denominaba o ?mal do século?. O a g u i r r i s m o habería que velo tamén como o destino tráxico do poeta enfrontado coa sociedade; un camiño parello ó que seguiron outros dos nosos tráxicos románticos como Añón ou Vesteiro. A rebeldía do poeta nada pode facer fronte ós poderes, chamémoslles fácticos. Aurelio Aguirre é para Murguía un deses poetas que poñen a súa lira á disposición dunha causa, dunhas ideas que se poden identificar co liberalismo, co amor ó pobo, á liberdade, ós grandes intereses da sociedade moderna. Non hai na semblanza do poeta famoso demasiados xuízos de índole crítica e valorativa, pero si hai algúns que é preciso sinalar porque delatan algunhas das concepcións que Murguía tiña sobre o feito poético. Por unha banda, caracteriza a Aguirre como un poeta que era o máis fácil, o máis espontáneo e o máis abondoso que coñecera a Galicia do XIX. Como se nos indicase que Aguirre era víctima desa facilidade e das présas coas que requirían os seus poemas os obreiros e universitarios, Murguía di que lle faltaba o máis importante nun poeta: o repouso, a reconcentración, a forzosa quietude e a soidade, valores que, como veremos, resaltará na tarefa poética de Pondal e que el mesmo reclamaba para o historiador. Tampouco lle concede a calidade de poeta descritivo. Prefire non os poemas máis explícitos e urxentes senón os que apuntarían cara a unha obra futura, feita con máis vagar e que decotou a morte tráxica de Aguirre, en 1858. Murguía cita, precisamente, o poema ?A una huérfana?. Poeta famoso e, ó mesmo tempo, malogrado; poeta comprometido cunhas ideas, velaí o retrato crítico que nos amosa.