Eladio Rodríguez González
BOLETÍN DA REAL ACADEMIA GALEGA
DISCURSO DE CONTEST A C I Ó N Domingo GarcíaSabell
Sres. Académicos: Miñas donas e meus señores: Veleiquí un día de ledicia para esta Real Corporación. Vimos de incorporar na Academia a dous outos valores da cultura actual. Trátase de dúas figuras de máximo releve que teñen ben demostrado, pola súa obra, a adicación constante ao labor nos eidos do espírito. Cando a Xunta de Goberno tomou o acordo de que o profesor Piel e o escritor Camilo José Cela fosen distinguidos co nomeamento de Académicos de Honra e cando pouco despois o conxunto dos Señores Numerarios dou, por unanimidade, o placet, eu, persoalmente, e conmigo os compañeiros da Xunta de Goberno, sentimos unha fonda satisfacción. Algo así como o sentimento, sempre grato, do deber cumplido. O Profesor Joseph Piel leva consumidos longos anos da súa vida no estudo e na pescuda filolóxica da Toponimia e da Onomástica galega e galegoportuguesa. Os traballos de Profesor Piel teñen ese rigor, esa seriedade, esa honestidade e esa fecundidade tan propias das investigacións alemanas, sexan éstas do campo que sexan. Hai un estilo de profundización tudesco tan cinguido aos temas de que trate, e tan sabidor de todo o que toca a eles mesmos, que coido dispoñemos dunha soia palabra capaz da abranguelos na súa última significación. Esa palabra é: seguridade. Ler calisquera dos estudos do Profesor Piel é sentir a sensación de que tripamos chan firme. O coal non quere decir, nin moito menos, que ese chan firme non ofrezca dúbidas, matices e variadas posibilidades de interpretación. Pro o que dá perfil específico ás pescudas do novo Académico é, xustamente, que aínda as ambigüedades e as incertezas, as escuridades e as problematicidades, son eso, cousas discutibles porque a súa esencia ven dada pola ambivalencia da súa propia testura. O Profesor Piel, cos seus traballos, torna nidia a mesma toldadura da realidade estudada porque fai dela toldadura básica. De ahí a enorme lección que se desprende dos seus escritos. E isa lección, ise aclaramento, está levado a cabo para favorecer o entendemento dunha ampla e variada leira de nós: a leira da lingua.
343
Nº 364