Estudos e investigacións sobre María Mariño
BOLETÍN DA REAL ACADEMIA GALEGA
sión e aceptación da enfermidade e a morte. Segundo esta perspectiva, a natureza actuaría, na experiencia mariñana, como substituto do corpo enfermo, vertendo sobre ela as aspiracións que neste se atopaban frustradas. Non obstante, é preciso recoñecer que o vínculo que se establece entre a voz poética e o mundo natural supera bastante esta posible relación, xa que non se limita a Verba que comenza, poemario que plasma a vivencia da enfermidade da escritora, senón que é visible en toda a súa produción. Por outra banda, Uxío Novoneyra defendía que a mística de Mariño se relacionaba coa vivencia e consideración da morte no contexto ideolóxico existencialista moderno, na liña reflexiva característica da chamada Escola da Tebra, á que o propio Novoneyra se adscribe. Non obstante, tamén consideramos que xustamente a través da relación da autora coa natureza se pode establecer que non é a morte a única causa determinante da súa experiencia porque, á fin e ó cabo, Mariño realiza unha fusión coa natureza no que esta ten de permanente, incluso cando as manifestacións que lle chegan dela son as dun mundo terminal e apocalíptico, cousa que ocorre, sobre todo, nalgúns textos de Verba que comenza; noutros casos, a plenitude natural, nunha consideración vital e optimista, non impide a percepción transcendente da realidade. Tal e como opina Carmen Blanco (2007), a intimidade da autora non é solitaria e pechada, senón aberta á materia. Teñamos tamén en conta que, como xa foi proposto, a mística non se constitúe nun tema en si ou que, alomenos, sería unha sorte de tema transversal que manifesta unha actitude común respecto do mundo e da realidade, visible, xa que logo, en todos os aspectos que percibe a autora, incluída a morte. Representa esta, logo, unha peculiar visión do mundo natural. Xa dende o primeiro poema de Palabra no tempo atopamos esa especial e intensa relación co mundo natural como desvelador dos misterios. Alí, a voz poética lembra a infancia como espazo e tempo no que a revelación comezaba, matizada pola ausencia dun proceso lóxico que tentase analizala, pola inocencia: ?¡Son aquela! / ¡Son aquela que no bosco / escuitaba o himno dela!? (63). A aproximación, neste caso ó bosque, é unha evidente representación do misterio percibido a través da materia natural, e un símbolo que enlaza abertamente coa tradición mística, posto que, como María Zambrano propón:
El claro del bosque es (...) otro reino que un alma habita y guarda. Algún pájaro avisa y llama a ir hasta donde vaya marcando su voz. Y se la obedece; luego no se encuentra nada, nada que no sea un lugar intacto que parece haberse abierto en ese solo instante y que nunca más se dará así. No hay que buscarlo. No hay que buscar (1988: 11)8
Dúas son as manifestacións físicas fundamentais do natural en Mariño, en relación coa cuestión referida ?a montaña e o mar?, tal e como a crítica ten recoñecido. Son os territorios físicos do decorrer vital, en relación co espazo real do Courel lugués, e o da infancia e xuventude, relacionado coa vida en Noia. Son, en calquera caso, espazos extremos, de carácter cósmico, ós que a voz poética se refire, habitualmente, con termos
23 Nº 368