Estudos e investigacións sobre María Mariño
BOLETÍN DA REAL ACADEMIA GALEGA
Podemos deducir, logo, o carácter polimórfico desta experiencia, entendida non tanto como un tema en si, senón como unha actitude estética e vital, un procedemento de busca aplicado a calquera obxecto e que acaba por confluír e dialogar, debido á esencialidade dos seus métodos, con experiencias equivalentes doutros ámbitos. Daquela, e en calquera caso, a cuestión da mística resulta inevitablemente vinculada ó problema dos códigos expresivos ou da linguaxe, porque se trata, en esencia, dunha experiencia que precisa dun xeito especial de referir algo que, no fondo, é inexpresable por métodos tradicionais. Tal é, entón, a relación necesaria que se dá entre a mística e a poesía: ambas precisan dunha reformulación da linguaxe que lles permita dar saída ás súas respectivas experiencias e, entre tanto, resultan actitudes rompedoras e irrespectuosas coa palabra entendida como instrumento de transmisión de coñecementos, de comunicación, e non como ferramenta de busca e creación do sentido e de construción da realidade. Palabra e coñecemento, daquela, centran o debate sobre a mística, sobre todo dende a óptica filosófica contemporánea. É, antes que nada, unha experiencia da linguaxe que se manifesta, incluso cando o obxecto que motiva a experiencia é outro ?a natureza, por exemplo?, a través das formas arquetípicas da lingua: o falar, o escoitar, o ler e o escribir. 2. MARÍA MARIÑO E O LUME MÍSTICO Non resulta estraño, entón, que para analizar o caso de María Mariño, pola súa peculiar elaboración da linguaxe poética, a súa actitude un tanto panteísta, a relativización da noción de identidade e outros principios xa mencionados pola crítica, a idea do misticismo teña enraizado tan fondamente. O noso obxectivo neste traballo é comprobar ata que punto dita denominación responde a unha experiencia que vai máis alá da simple clasificación literaria. Tentaremos, logo, indicar os trazos máis salientables que se poden atribuír a esta experiencia da linguaxe e da vida que é a obra da escritora noiesa6. Un dos primeiros elementos visibles nesta elaboración da mística é que non se trata dunha experiencia especialmente relixiosa, no sentido ortodoxo, católico. Existen moi poucas referencias directas, neste senso, que nos fagan pensar nunha visión militante, e atópanse limitadas case sempre á denominación ?Señor? (65, 169, 196), que conviven, ademais, con outras igualmente presentes e incluso máis abundantes, cunha idéntica intensidade e que tamén posúen carácter transcendente, como se deduce da súa transcrición en maiúsculas, do tipo Tempo (126, 128), Sol (129), Lúa (167), Ceo e Terra (141), Natureza (143, 154), Outono (144), Primaveira (77), Maio (122), Mundo (124, 181, 205), Verdá (77), Non (139), Esperanza (139), etc. Trátase de alusións á materia concreta que se presenta na súa forma transcendentalizada, no momento no que desvela a súa esencia e se ofrece á contemplación da poeta na súa plenitude, posuíndo, por ende, carácter sacro. Esta espiritualización da materia ou materialización do espírito
21 Nº 368