BOLETÍN DA REAL ACADEMIA GALEGA
Estudos e investigacións sobre María Mariño
O termo tense aberto, incluso, cara a ámbitos non estritamente relixiosos, aínda que, como dicimos, relacionados cun sentido sacro ou transcendente da existencia, mediante adxectivacións peculiares, como a empregada no caso de María Mariño, de ?mística materialista?, que en moitos casos van incluídas implicitamente na propia definición do concepto. Tampouco resulta estraño comprobar como certos conceptos de orixe mística pasan a outros ámbitos da realidade e a ideoloxías que resultan opostas e contraditorias na confrontación de paradigmas conceptuais, alomenos en aparencia, como pode ser o caso das ideas da alienación ou da dialéctica negativa que, como é ben sabido, foron adoptadas por Marx para as súas análises sociais e figuran, incluso, entre os conceptos de Theodor Adorno. En calquera caso, o uso do termo revela un intento de dar saída a unha actitude vital e ideolóxica que non cabe dentro dos canons tradicionais do pensamento. Dende o punto de vista artístico e, sobre todo, literario, a mística vén ser unha formulación case taxonómica que se refire a algún xeito de heterodoxia lingüística, estética, expresiva, hermenéutica, etc., unha conciencia distinta das opcións que ofrece a realidade e unha apertura cara a formas non usuais da expresión e do coñecemento. A propia definición etimolóxica do termo orienta a cuestión cara ó mundo do íntimo, tratado non dende un punto de vista lóxico ou racional, senón intuitivo e irracional e que ten que ver, ante todo, cunha experiencia persoal do extremo, do periférico e do non normativo, que se sitúa, dende un punto de vista sociolóxico, case sempre, en marxes minoritarias e fronteirizas, cando non, directamente, no exilio e na heterodoxia. Por volver momentaneamente á cuestión da posmodernidade, tamén é preciso destacar que a noción da mística é enfocada cunha concepción aberta e universal, sobre todo na actualidade, orientada ó diálogo intercultural e interartístico. Inclúe, por suposto, as confluencias da mística cristiá coas experiencias equivalentes, no terreo filosófico ou relixioso, do mundo islámico sufí e hebreo, así como da variada diversidade das místicas orientais. Ó mesmo tempo, non resulta nada estraña a incorporación da terminoloxía e incluso dos enfoques místicos en certos sistemas filosóficos, como ocorre xa no caso de Hegel1 cando define as ideas de alienación e éxtase, a vía negativa ou o sentido da unidade esencial no absoluto, derivadas do seu contacto con místicos europeos como Johannes Eckhart, Jakob Böheme ou Angelus Silesius; por outra banda, nunha sincronía máis contemporánea, é ben coñecido o achegamento de Martin Heidegger á linguaxe mística2, así como as relacións de Ludwig Wittgenstein3, Karl Jaspers ou, por pór un caso hispánico, María Zambrano4, con ese terreo da reflexión filosófica moderna sobre a linguaxe e na superación das fronteiras metodolóxicas e intelectivas da razón pura. Igualmente, resulta unha idea recorrente a da relación das experiencias místicas co mundo artístico e estético, como ocorre, no terreo da plástica, con Antoni Tàpies ou Jorge Oteiza5, por propoñer uns referentes evidentes das artes hispánicas contemporáneas.
Nº 368 20