BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
definición ideolóxica moi clara a favor da causa rexionalista, verdadeiro motor deste corpus de textos.
OS ÚLTIMOS RELATOS (19101928) Despois dos atarefados anos de transición entre un e outro século, Manuel Lugrís Freire semella tomar folgos nos primeiros anos da década 191020. Repasando a biografía do escritor de Sada, axiña comprobamos que non é un abandono da actividade cultural, literaria e política, senón que é un descanso para tomar un novo pulo coa chegada das Irmandades da Fala no 1916. Entre o 1910 e o 1916 só rexistramos reproducións de relatos xa publicados anteriormente, pero a partir do ano de fundación das Irmandades, vemos como, progresivamente, o noso autor dará a coñecer novos textos e volverá a recuperar outros antigos na nova etapa d'A Nosa Terra. Así, cómpre salientar a publicación de ?¡Boa perda!?39, felizmente recuperado no 2006 grazas ao traballo investigador de Xosé Manuel Fernández Costas40. Tamén merece destacarse a edición dos Contos de Asieumedre de 192041, na que se mantén a mesma capa ca no 1909 e tamén segue F. Cortés como ilustrador, pero muda a editorial xa que neste caso o libro saíu dos prelos da Litografía e Imprenta Roel, tamén coruñesa. Non é esta a única variación con respecto á primeira edición posto que aparece o relato ?O verbo?, novidade nesta edición, como o primeiro de toda a colección. Ademais, unifícanse as grecas que decoraban o inicio de cada conto baixo un único modelo con motivos xeométricos e desaparecen as miniaturas que pechaban cada relato na primeira edición. O número de ilustracións redúcese a vinte e tres, desaparecendo algunha tan destacada como a que comentabamos de ?A carón do lar?. En canto aos relatos, non figuran ?O mellor amante?, ?A illa milagreira? e ?Unha cantiga de Chané?, aparecendo como novidade ?Con polaina e media? e o xa mencionado ?O verbo?. A presenza destes novos textos modificou escasamente a orde de aparición dos demais contos. Desapareceu a ?fe de erros? que figuraba na primeira edición, e o prezo do volume era, neste caso, de setenta e cinco céntimos de peseta, tal e como podemos comprobar na contracapa, onde tamén figura a listaxe de obras do autor que, con respecto á anterior edición, vese acrecentada con Estadeíña, O pazo e Versos de loita. Neste caso as peticións había que dirixilas ao número 25 da coruñesa rúa Panadeiras, morada do autor no 1920. Foi, esta, a derradeira edición dos relatos de Lugrís en vida do propio autor, xa que os textos aos que nos referiremos a seguir non coñeceron a publicación en libro até datas máis recentes. ?A Mareira?42 é un conto que Lugrís lle dedicou a Suárez Picallo, compañeiro de proxecto político nese momento e en datas posteriores xa que ambos militaron no Partido Galeguista e foi un xesto de xenerosidade de Lugrís o que lle permitiu a Suárez Picallo ocupar unha acta de deputado nas Cortes Republicanas. O texto foi reproducido no 1927 nun apéndice en prosa do poemario Ardencias.
Nº 367 48