Estudios e investigacións sobre Avilés de Taramancos
BOLETÍN DA REAL ACADEMIA GALEGA
A saudade é en Antón Avilés de Taramancos un signo de dor e de tristura, mais tamén é unha forma de enerxía, unha luz prodixiosa, un alimento poético. A intensa capacidade perceptiva do poeta, o seu poder visionario, crea fondos pousos activos na memoria. A súa poesía é expoñente dun inmenso fervor sensorial, unha instancia que o poeta cultiva tamén investido pola saudade. E esa saudade, esa saudade dividida, fendida no corazón do poeta ??a saudade no tempo??, é producto tamén dunha gran capacidade para amar: amar dúas patrias e dúas terras entrañabelmente, mineralmente, como casas matriciais, como ineluctábel destino. Poesía do arrepío luminoso, do abraio permanente, hai unha aura térmica que envolve como unha exhalación o seu verso exacto, a música continua que vibra no corpo e nas voces do poema. Popaián, Timbío, Chachauí, Palmira, Tuluá ou Sandoná son os nomes da terra nomeada e posuída, igual que Boa, Taramancos, Noal, Nebra, Meruso ou A Choeira: un amor que se funde no xerme e na arxila, no vello saibo das bagas, no limo das idades, no sancocho e os trapiches, no frescor dos outeiros e nos cómaros anovados. Poucas obras poéticas, como a de Avilés de Taramancos, son resultado tan directo dunha inmediata e profunda alianza coa vida. Agora sabemos que a saudade é tamén un territorio aberto, unha luz íntima e universal acesa no ?cumio altísimo dun monte solitario?. A saudade entendida como música que abre as portas e brune os fanais, ?única latitude?, tremor irrepetíbel e ?corazón coa raíz revirada na beiramar do tempo?:
Ouh territorio aberto, planura do confín, miña outra casa, terra onde o pan é frutal e o ar encelma a sede máis enxoita e corrosiva, ai amor que me fenden os raios da saudade, e quero ollar a estancia, encravar na pupila para despois da morte esa luz que me cruza, ese olor que me chega, cilantro e malvasía, ese amor meu que nunca. É deste sofrimento que aluma a miña teia, é deste sofrimento, é desa luz que vivo, do carcomer peremne de apreixar o olvido e telo tenso, roxo nas brasas da memoria, ir de avarento amándoo con palabras cada día máis cálidas até telo ancorado no meu porto segredo. É dese amor que vivo; e máis do amor que agora no lar recuperado erguen vellas columnas, antigas mans que me aman, a emanación dos átomos de meus avós no vento, a terra prometida.
173
Nº 364