BOLETÍN DA REAL ACADEMIA GALEGA
Estudios e investigacións sobre Avilés de Taramancos
co xornalista Xan Carballa, que a mente se divide en tres partes: ?unha terra que abandonache, que fica como unha postal fixa na memoria e que non vas topar nunca; outra, o territorio novo, aberto, no que pasache a mellor parte da túa vida; e, outra, o novo encontro cunha terra que estabas soñando pero que non atopas e tes que construír de novo?. Mais o esforzo do poeta por atopar e posuír a terra, as terras vividas, será extraordinario. Entre a terra nativa e a terra que o adopta por espacio de case dúas décadas establecerase unha forte tensión vital e poética. O poeta entende que do proceso de ?ensoñación? da terra a ?recuperar? xurdirá, son as súas palabras, ?unha nova poesía e unha nova maneira de sentir a poesía?. Sabe Antón Avilés que existe unha patria real e unha ?patria superposta?, mais, no seu caso, producirase entre as dúas un ?efecto espello? de indubidábel carga emotiva e transcendencia persoal e poética. Así, non será nada raro que polas terras do xoropo, do xaguar ou do papaio e nas ribeiras do Guaviare, do Meta ou do Vichada sinta o poeta a visita do noso mar fisterrán cheo de brétema:
E chorei como un home, como un lobo atrapado: non chorei de saudade nin de amor nin de ira, foi o pranto dun tigre malferido e lonxano, o agromar do home mariñeiro que un día acorei no burato máis fondo do meu sangue.
O poeta, neste tempo no espello da ausencia colombiana, celebrará a figura entrañábel da súa avoa, Pepa de Pastora ??que me ensinou a sementar, a penetrar os misterios da terra??, cando esta fai, ?vertical como a esperanza?, oitenta anos e mostrará tamén a súa ligazón telúrica coa nai ?a terra é un símbolo do corpo maternal? no segundo soneto pertencente a ?Momentos de terracota?:
Sinto esa voz de nai cordial e dura que se aferra no sangue docemente, e vai cavando toda esta longura da saudade máis erma e máis doente.
Cando nace o seu primeiro fillo, froito feliz de sangue noiés e cundinamarqués de Cáqueza, Antón Avilés escribe un longo poema titulado ?Cántico de anguria e de esperanza pra arrolar o meu neno?; neno que será ?semente miña aberta na saudade? e a quen lle falará con dozura de pai para sementar nel ?a terra que me queima fondamente, / eido dos teus avós por parte miña?. E confíalle aínda ao fillo amado:
Todo isto que encontras na calor do meu peito, o rumor do granito, da chuvia, da morriña, é a voz da miña patria que te ampara, a ti nado na ausencia, a ti, miña semente en terra allea, tan inocente e xa crucifixado.
Nº 364
170