BOLETÍN DA REAL ACADEMIA GALEGA
Eladio Rodríguez González
O idioma galego brilla nestas composicións con esplendorosa riqueza de léxico e sintaxe, pois son obra dun experto falante dialectal ourensá, que puxo parte da súa vida ó servicio da lingua do país. Lendo as primeiras e únicas edicións dos seus libros, gózase percorrendo a limpeza e sinxela factura dos seus versos, que é desde o meu punto de vista, un risco nel de modernidade. Estas dúas virtudes da poesía de Rodríguez González poden xustificar por si soas a consideración dos seus compañeiros literatos e o éxito de que gozou en vida. O silencio e o sambenito da escasa crítica que se lle dedica na posteridade, trala lagoa franquista, arrombaron os seus versos ó curruncho do esquecemento. Ricardo Carvalho Calero dedicoulle unhas interesantes páxinas na súa Historia da Literatura Galega Contemporánea, que evidentemente produciron un efecto negativo para a fortuna da obra de don Eladio. Carvalho sinalaba a habelencia métrica e o esmero lingüístico que quixemos nós facer constar como conclusión primeira da lectura dos seus versos, pero tamén vai dando notas negativas que o reducen á consideración dun escritor epígono que pouco engade ó costumismo na poesía da época; e a penas si repara nos valores estéticos de Oraciós Campesiñas (R. Carballo Calero, 1981: 488489). Cremos que de aquí saíu a idea nunca revisada da súa case nula contribución á poesía galega de entre séculos. Ben é verdade que don Eladio foi epígono ou continuador que fixo de elo entre os grandes poetas do Rexurdimento: Rosalía de Castro, Eduardo Pondal, Manuel Curros Enríquez, e as novas xeracións do comezado século XX. Pero o seu traballo de fortalecemento da iniciada e abaneante literatura galega é admirable e absolutamente necesario, nun momento clave no que se xogaba o futuro das letras galegas. Polo seu carácter e formación, e polo tempo que lle tocou vivir, cultiva unha literatura epigónica en Folerpas (1894) que, despois do galano nacionalista Raza e Terra (1922) destinado á a colección Céltiga de Ferrol, alcanza o seu cumio persoal en Oraciós Campesiñas (1927). O primeiro e último libro son recompilacións dos poemas de mocidade e madureza, algúns dos cales o autor foi presentando a varios certames con éxito case sistemático, ou dando a coñecer na prensa, desde A Nosa Terra ata Alfar, pasando polas publicacións que el dirixía na Coruña. Non volvería a publicar máis colectáneas antes da súa morte moitos anos despois. Centrarémonos nos tres libros publicados por Eladio Rodríguez para intentar unha aproximación crítica que sirva alomenos de proposta de liñas futuras de investigación. Entre a primeira e a segunda colectánea queda claro que existe unha enorme diferencia: a que dá o cambio estético de séculos na literatura europea, por un lado; e por outro, a conmoción do renacer da literatura galega, no contexto do avivamento das literaturas vernáculas. Entre estas últimas, non fai falla dicir que é a catalana a máis próxima ós escritores galegos, pois se trata de dúas literaturas de pulo político que durante os anos da Liga Gallega e Solidaridad Gallega van a entrar en estreito contacto. Así, a poesía que se cultiva en Galicia na Fin de Século está determinada pola
Nº 362
82