Estudos e investigacións sobre Xaquín Lorenzo Fernández
BOLETÍN DA REAL ACADEMIA GALEGA
O 29 de outubro de 1977 foi para el un dos grandes días da súa vida: o ministro de Cultura, Pío Cabanillas Gallas, inaugura as primeiras salas do Museo do Pobo Galego con sede no antigo convento compostelán de San Domingos de Bonaval. A mostra máis elocuente do aprecio que sentiu por esta institución é a que a deixase herdeira da biblioteca, parte do arquivo fotográfico e dos dereitos de autor de todas as publicacións. Presidiu o padroado por derradeira vez o 17 de decembro de 1988:
[...] En realidade nós queremos todo no Museo do Pobo Galego. Porque cando se fala da cultura dun pobo non é só a cultura popular. Hai que ter en conta que a cultura popular dá despois lugar, valga a redundancia, á cultura culta [...] Así o Museo do Pobo Galego comeza por aí, pola prehistoria, e logo claro, imos reunir todo o que poidamos en canto a eses obxectos materiais de cultura [...] Pero por outro lado tampouco queremos que o Museo do Pobo Galego sexa unha obra morta. Non queremos que o Museo sexa un cuarto onde se meten en frascos con alcohol uns exemplares de cousas pra que as xentes as vexan, non. Queremos algo vivo, e ese algo vivo farase a base de publicacións, a base de conferencias, a base dalgunhas exposicións [...] Porque a etnografía está nun perigo gravísimo e a xente non se dá conta deste perigo. Un castro ou as ruínas dunha vila romana, por exemplo, se non se escavan hoxe, escávanse dentro de cincuenta anos, as cousas están alí soterradas, esas xa non se perden. En cambio as cousas que o pobo usa, que vai desbotando, esas desaparecen. Hoxe xa é dificilísimo encontrar algunhas cousas destas do pobo. Hoxe un arado de madeira xa é difícil, unha cambela costa Dios e axuda dar con ela. Agora andamos eiquí atrás de conseguir unha barca ?de dornas? do río Miño que desapareceron practicamente. E dese xeito, hai outras moitas cousas que se están perdendo definitivamente, que hai que recollelas agora, porque é o intre agora, en canto deixemos pasar uns anos, de todo eso non queda xa nada, e naturalmente esas cousas convennos conservalas. A única maneira de entender un pobo é o entender a cultura dese pobo, e a cultura é a cultura popular, que esa non se improvisa nin pode vir de fóra porque esa é obra do mismo pobo. É tan obra do pobo como é o idioma. Nós non podemos esperar pra comunicarnos que nos veñan traer unha lingua de fóra. Temos que usar a nosa, o galego, e a nosa cultura ten que estar basada nesa cultura popular; na cultura que fixo o pobo. Poden vir de fóra mestres da pintura ou da escultura ou da literatura, do que non poden vir é mestres que sean capaces de facernos un arado de madeira ou de facernos unha agrade ou de montarnos un muíño de rodicio [...] (VÁZQUEZMONXARDÍN FERNÁNDEZ, A., 1999: 51, 52, 53).
Nos últimos anos da vida o seu labor é recoñecido por todos: premio Ramón Otero Pedrayo (1982), Fillo Predilecto da provincia de Ourense (1983), presidente de honra do Pedrón de Ouro (1983), Corista de honor e mestre de Galeguidade da coral De Ruada (1983), Premio Trasalba (1983), Medalla Castelao da Xunta de Galicia (1984)... o concello de Muíños dedícalle unha rúa (1985), o concello e comunidade educativa do colexio público de Bande acordan que o centro leve o seu nome (1989), etc. Confiou no futuro e, sobre todo, na xente nova, que é a que pode seguir o vieiro dos homes da Xeración Nós e da Xeración do Seminario de Estudos Galegos, á que el pertence:
191 Nº 365