Estudos e investigacións sobre Xaquín Lorenzo Fernández
BOLETÍN DA REAL ACADEMIA GALEGA
O 7 de xaneiro de 1942 constitúese o grupo Marcelo Macías de colaboradores do Museo Arqueolóxico Provincial, ó que pertence Xaquín Lorenzo e do que dende 1982 será o presidente. Por esta época tamén se crea en Santiago de Compostela o Instituto P. Sarmiento de Estudios Gallegos, co gallo de encher o oco cultural do desaparecido Seminario de Estudos Galegos. O seu labor case se limita a colaborar na revista Cuadernos de Estudios Gallegos, na que publica en total once traballos, a maioría deles con Florentino L. Cuevillas, M. Rubén García Álvarez e Fermín Bouza Brey; e o libro Inscripciones romanas de Galicia. IV. Provincia de Orense (1968) en colaboración con Álvaro D'Ors e F. Bouza Brey. Como xa viña facendo dende os anos mozos, non se esquece da arqueoloxía, tomando parte activa en varias escavacións, e máis dende que en 1946 é nomeado colaborador da Comisaría de Excavaciones Arqueológicas, xunto con Ferro Couselo, Taboada Chivite, Chamoso Lamas, García Álvarez, etc. Participa coa Coral De Ruada, da que era vogal asesor, sobre todo en 1948 en que se encarga de redactar co gallo de ser Ano Santo Compostelán un texto de evocación histórica titulado Camino de Santiago, que consta de cinco cadros e un limiar, nos que se conxugan o texto e diferentes pezas de música popular, consonte o lugar xeográfico por onde pasan os peregrinos (VALES, X., 2000). O 16 de setembro de 1951 ingresa na Real Academia Galega como membro numerario, tendo lugar o acto no mosteiro de Celanova. O discurso versou sobre La casa gallega, e a resposta correu a cargo de Ramón Otero Pedrayo. Foi, sen dúbida, o primeiro grande recoñecemento de todo o labor como etnógrafo e arqueólogo, dende que empezara a publicar na revista Nós en 1927. Por estes anos traballa arreo percorrendo toda Galicia na achega de datos para a súa grande obra: Etnografía. Cultura material, que será o volume II da Historia de Galiza que dirixe Otero Pedrayo (Bos Aires, 1962). Trátase do libro máis importante publicado deica hoxe verbo da nosa Etnografía; ademais do texto conta con 351 figuras (a maioría de varios obxectos) e 163 fotografías, todo da súa autoría. As obras seguintes en importancia son a dedicada ás inscricións romanas, feita con Á. D'Ors e F. Bouza Brey (Compostela, 1968), e o Cantigueiro popular da Limia Baixa, que malia que sae en 1973, o traballo de recompilación fixérao antes de 1932. O seu derradeiro libro é o Refraneiro galego, editado pola editorial Castrelos de Vigo en 1983. Traballa, colabora, dá conferencias, intervén en toda clase de actos culturais..., principalmente en Ourense, ata que en 1976 se constitúe o padroado do Museo do Pobo Galego, do que é nomeado presidente, cargo que ostenta ata o pasamento. Este museo é o herdeiro daquel que con tanto esforzo creara o Seminario de Estudos Galegos, e do que el fora director por algún tempo, pero que desbaratara a sublevación militar de 1936. Cando xa tiña 70 anos presentiu que aínda había a posibilidade de que se fixese reali189 Nº 365