130
BOLETÍN DA REAL ACADEMIA GALEGA
tiago, 1829), outro cuñado de Alejandro e do editor Carballo, fíxose notar desde o primeiro intre. Comprara (con cartos que lle anticiparon os editores políticos) unha imprenta que acabará sendo da súa exclusiva propiedade. Como impresor, viña das mellores tradicións compostelás. O establecemento tipográfico Viuda e Hijos de Compañel fora protagonista da explosión periodística e galeguista da cidade natal nos anos corenta. Juan púxose ó día en Madrid, onde outro irmán político dos anteditos, o revolucionario liberaldemócrata Eduardo Chao, dirixía as coleccións máis emblemáticas do grupo editorial Gaspar y Roig, chamado a selo primeiro en importancia dos españois. La Oliva (El Miño despois), coa contribución de Compañel, Murguía e os Chao foron periódicos sorprendentes non só polo continente e o contido, tamén polas novidades que introduciron en tódalas ordes: comerciais, publicitarias, recreativas, etc. Os folletíns e as bibliotecas literarias por entregas, como se dixo da prensa de Madrid, gardan directa relación con este entretecido comercial duns productos que buscaban subscritores. Mais o ton galeguista que adoptaron as seccións desde o primeiro intre, permitiulles transcender (na aparencia cando menos) as tensións locais máis enconadas. Así, cando La Oliva tivo problemas de continuidade que semellaban invencibles, xa fixera escola, creando unha demanda de orixinais insólita en Galicia. Os irmáns Rodríguez Seoane e Fernández Anciles crearon en Pontevedra El País, periódico máis efémero, pero con semellante orientación galeguista (a pesar da tensión tradicional da capital pontevedresa coa vigorosa cidadeporto). Outro tanto débese dicir dos periódicos de Vicetto, publicados na Coruña (a pesar das tensións co porto de Vigo). O porto atlántico á fin de contas (cos Chao e Compañel) recupera, actualiza, ¡xeneraliza e multiplica! a lendaria actividade compostelá dos anos corenta. Sabedores de que un periódico políticopartidario necesitaba subscritores, anuncios, grandes proxectos transformadores, o enfoque estivo claro desde o primeiro intre. Alejandro Chao, Fontano e Carballo darían presencia ás distintas faccións progresistas, democráticas e intelectuais que confluían na ubicua personalidade de Eduardo Chao. Auténtico ideólogo de La Oliva. Antonio Romero Ortiz, José Pardo Bazán, a condesa de Mina, Ventura Ruiz Aguilera, Castelar, Pi y Margall, Roberto Robert, entre outros moitos, circulan con normalidade polas páxinas do periódico desde a primeira saída. As utopías portuarias, ferroviarias,