188
BOLETÍN DA REAL ACADEMIA GALEGA
Estas son, pois, as dúas determinacións que actúan sobre o pensamento de Murguía no momento en que comeza a publicar cousas sobre a lingua galega: as ideoloxías que sobre lingua, raza e nación se espallan pola Europa posterior á Revolución Francesa, e a situación de Galicia nesta primeira metade de século. Como xa dixemos, Murguía considérase a si mesmo como un re s t a u r acionista, un membro da xeración de 1854, un precursor que por pudor non se inclúe como tal no seu libro do mesmo título Los Precursores, pero no que coloca na contraportada esta cita de Theophile Barriére: Que faites vous? Je ne fai rien, je fai les autre s. E este será o seu programa vital, que culminará co título e a honra de Patriarca da Letras Galegas, recoñecido por todos, a pesar de que non escribise a penas en galego. É máis, abandona unha carreira de novelista con certo éxito en castelán (Desde el cielo, Mi madre Antonia) para dedicarse a escribir sobre Galicia e sobre o galego. As ideas lingüísticas de Murguía están esparexidas por toda a súa obra, e non hai unha, desde a Historia de Galicia ou Los Pre c u r s o res ata o Xelmíre z ou El Regionalismo Gallego na que non aparezan. Pero hai dous artigos, separados os dous vinte anos no tempo, que explicitan con claridade a postura de Murguía ante a lingua e a literatura. O primeiro é case descoñecido e só reeditado en parte recentemente. Trátase de La Poesía gallega contemporánea publicado en El Museo Universal, de Madrid, entre xaneiro e marzo de 1858, cando Murguía ten vintecinco anos. O segundo titúlase ¿Desaparecerán los dialectos? e foi publicado en 1878 en La Ilustración Gallega y Asturiana, tamén de Madrid, que Murguía dirixía, e enmárcase dentro dunha polémica entre Juan Sieiro, catedrático de grego en Ourense e Murguía, reproducida logo en varios periódicos galegos. No primeiro artigo, P o e s í a g a l l e g a c o n t e m p o r á n e a , refundición de dous traballos anteriores, De las diversas causas que han influído en el desarollo de nuestra literatura pro v i n c i a l , La Oliva, Vigo, 1856 e Del poeta en Galicia en Floresta Universal, Madrid, 1857, Murguía fai un longa introducción antes de dar a coñecer mostras da poesía galega con exemplos de Pintos, Camino, e Añón. E fai tamén afirmacións que se repetirán e discutirán ó longo do século. Permítasenos facer citas, aínda que longas, sintomáticas de todo o proceso de ideoloxización da lingua que neste momento se inicia: