Estudos e investigacións sobre María Mariño
BOLETÍN DA REAL ACADEMIA GALEGA
a mente racional deixa de funcionar e é substituída pola simple contemplación do Misterio que se posesiona, en ondas, da súa identidade, do seu corpo, poderiamos dicir, e provoca nela unha inflamación e un arder incontrolado da materia que se comunica co todo ó que pertence. É un proceso complexo e de carácter ascendente que vai dende a intuición do Misterio, que se dá a coñecer sen mostrarse ou ben que chega a través da memoria, pasando pola agarda en quietude logo do desposuimento ou baleiramento do eu, a busca por tenteo ó ser suspendidas as categorías lóxicas do pensamento, a aproximación ó baleiro propiciatorio e a revelación infusa do mundo, que flúe anegando o sentido e evidenciando o ser da poeta. Pero tamén é preciso concluír que esta experiencia, que ten un contido netamente metafísico, debe ser entendida por igual nunha dimensión literaria ou, por ser máis precisos, lingüística. As equivalencias que se teñen establecido entre a experiencia mística e a poética constitúen, no caso da creación da autora, un exemplo altamente significativo. Estamos, en efecto, diante dunha vivencia da interioridade da palabra, que actúa como na tradición cabalística xudía, como espazo de mediación ou, segundo a terminoloxía teresiana, como morada. O atributo principal do Misterio é, xustamente, a palabra, que tamén se concibe, como levamos visto, como un obxecto material e moldeable que manifesta a potencia creadora do absoluto, posto que é unha verba vella, esencial, orixinaria. O pensamento, unido á vida, ó mundo e á palabra, sofre tamén un proceso de depuración do superfluo para quedar nun fluxo que o presenta como emanación do elemental e non redutible a categorías lóxicas. Fálanos a autora do pensamento como verdade percibida por medios alóxicos e expresada por un código poético, facendo certa a tópica unión clásica entre verdade e beleza ??As galas daquel bon día de terra volven de novo a min / certas, verdadeiras? (209)? e a idea da verdadeira poesía como exploración do descoñecido, entrada no baleiro e aproximación ó abismo. O pensamento, como a palabra e mesmo o ser, fican erosionados e desgastados por ese intenso contacto coa beleza do Misterio, renuncian a posuírse e regálanse para arder e permanecer en cinza. Estamos, logo, diante dunha experiencia integral e vital. Explica e xustifica as distintas vivencias da autora e non se atopa illada do transcorrer da vida, porque non é un episodio á parte, senón unha perspectiva e un punto de vista que anima e percorre transversalmente todas as facetas do vivir, mesmo dándolles sentido; parafraseando a idea de Roman Jakobson, podemos dicir que para María Mariño a poesía é a vida na súa función mística, unha vida que na súa plenitude cósmica se verte en ausencia.
47
Nº 368