BOLETÍN DA REAL ACADEMIA GALEGA
Estudos e investigacións sobre María Mariño
Para tentar concluír algunhas ideas sobre as cuestións tratadas, aínda que poderiamos facer referencia a temas que implícita ou explicitamente forman parte do fenómeno místico, tan amplo como variado, tal como a soidade, pecharemos a cuestión supoñendo que todo este amplo e rico proceso vén resolverse no problema do ser ou do non ser, no recoñecemento da identidade. En efecto, a poeta rastrexa as súas orixes nunha dimensión ao tempo afectiva e cósmica ?tamén, sen dúbida, familiar ou persoal?, tratando de resolver a dualidade que a separa, como ser individual, do Mundo. Procura, logo, ser recoñecida no lugar do que procede. Son moitas as ocasións nas que a voz poética manifesta a repentina aparición epifánica do seu ser na resposta que recibe por parte do mundo. Sirva, como exemplo, o ?¡Xa vexo!? gozoso e o ?¡Xa son!? pleno que lemos no poema 15 de Verba que comenza (173174), ou no 31, onde a ?hora que marcou o tempo?, a hora da manifestación, vaise facendo patente e ocupando o espazo, outorgando á voz poética a súa totalidade e a súa identidade ?¡Xa sei quen son! / Hoxe que me teño toda, amigo? (204). A morte, que foi considerada eixo central da reflexión da escritora, non parece ser, non obstante, o final. Olga Novo opina, na mesma liña, que a súa non é unha poética da morte, senón da existencia (2007: 127). En calquera caso, poderiamos matizar que a morte non é unha potencia da nada nihilista ou negativa, senón unha forma de manifestación do absoluto por medio da nada positiva. A morte foi unha presenza latente sobre todo en Verba que comenza pero tamén é certo que noutros apartados da súa escritura esta presenza non é tan obvia nin perentoria; non obstante, a mística, entendida como unha actitude de apertura ó mundo, mística natural ou materialista, logo, é unha constante dende os seus primeiros poemas. Non se explica, daquela, a súa aspiración funtiva co mundo polo acoso ou a inminencia da morte, senón, precisamente, por unha busca intensa da continuidade da vida, por tentar rescatar do esquecemento a latencia ou as pegadas do ser e tamén por un desexo de ser cando xa non se é. Como xa propoñiamos nalgunha ocasión, sen desbotar unha presenza relixiosa obvia nalgúns casos, non consideramos, non obstante, que sexa esta unha experiencia especialmente ortodoxa, dogmática nin tan sequera militante, no sentido da práctica cristiá. O sentido do sagrado supera ó do relixioso, e mesmo existen elementos suficientes que asocian a percepción mariñana cun certo panteísmo e cun materialismo de corte transcendente. As mencións relixiosas, daquela, puntuais e dispersas, deberían entenderse nesa liña de interpretación, como mencións ó absoluto. Non son na experiencia da autora as grazas dadas gratis ?gratia gratis data ou fenómenos secundarios como a levitación, a profecía, etc.? as fundamentais, nin tan sequera dominantes. Non é a súa unha experimentación espectacular, externa ou formal, senón, sobre todo, íntima e persoal, nun fluxo mutuo do dar e recibir entre a materia do mundo e a voz poética. A dimensión na que se move a autora parece, pola contra, máis próxima ás experiencias da escuridade e do coñecemento infuso ou non voluntario, onde
Nº 368 46