Estudos e investigacións sobre María Mariño
BOLETÍN DA REAL ACADEMIA GALEGA
máis da predominancia da memoria como mecanismo de recuperación do misterio atopámolo no poema ?Historia e gaiteiro?, onde a música da gaita actúa como catalizador do recordo, pero do recordo dunha materia absolutamente esquecida, en tanto que non pertence nin sequera á memoria particular da voz poética, senón á colectiva dos antepasados; falamos, daquela, da memoria do pobo, unha reminiscencia antropolóxica e filoxenética: ?De entre fieitos naz a voz do noso gaiteiro vello. / Fai de escudo a súa estampa. / De retorno sempre o són. / Soio é peito a súa fala. // O seu paso ben gardado entre pinos e prazuelas, / fogueteiros e campás, nunca o soupen describir. / Digo o dos meus avós, cando falaban sin min? (71). Case no mesmo sentido podemos interpretar os seguintes versos: ?A saudade de quen son é un peito sin borrar / o ditado vello feito de quen veo para non parar? (103), insistindo na continuidade da memoria non borrada. Esquecemento que fala é tamén o que vemos en ?Di o que eu esquecín i enxorda de hoxe o vivir? (122), referido ó silencio que se manifesta, isto é, ó baleiro que ten voz ou á chama que se acende de xeito súbito no medio da escuridade, como no poema 3 de Verba que comenza ??encende luz apagada daquel día que sobra, encende? (151). Daquela, o destino da materia esquecida é a lembranza da súa corporeidade, a recuperación memorística da mesma, de xeito que, como propoñía Henri Bergson39, os límites da percepción non se atopan confinados pola materialidade inmediata, senón pola súa continuidade, o recordo ou a memoria. Así, a propia vida pódese converter en material esquecible e, xa que logo, recuperable: ?Logo de min saeu texto / que inda ninguén atopou? (141), e así é posible dicir con pleno sentido que o individuo pertence tamén, en boa medida, ó territorio do esquecemento e dos obxectos non recuperados: ?Das cousas que non se atopan / tamén son, / das ondas que soio van, van e van, / delas son? (147) ou ?Son esquecida. / Non me atopa a terra? (178). Por suposto, nesa busca da orixe atemporal ancorada na memoria da inocencia cumpre unha función esencial a referencia biográfica ó pasado, concretada, por exemplo, na memoria da nai, pero tamén, en ocasións, da vila de Noia e, xa nun plano menos concreto e máis sentimental e simbólico, no mar. Neste senso, lembremos a caracterización da voz poética como unha estranxeira do mundo e fronte ó mundo, afastada do lugar propio, nunha vivencia de soidade que foi considerada, en varias ocasións, como unha sorte de noviciado (cfr. Otero Pedrayo, 1963) que lle serviría de preparación e ascese para a percepción das realidades transcendentes. É lóxico, daquela, que estes termos aparezan asociados á memoria: ?Campanas que tocades / todas do mismo xeito, / unhas chegádesme á alma / e outras ó pensamento // (?) // Fóra de ti cando as oio, / e sendo o mesmo tocar, / recólloas no pensamento, / xa non pasan máis alá? di no poema ?Noia? (101102)40. Tamén, segundo Carmen Blanco apunta, o lugar de referencia, a patria perdida que se persegue, é un obxectivo inconcreto representado mediante conceptos abstractos como ?lonxe? porque, de feito, o reino do místico non é deste mundo41.
45 Nº 368