156
BOLETÍN DA REAL ACADEMIA GALEGA
talentos literarios, unidos en matrimonio. Imos restrinxir necesariamente o eido de atención para cinguirnos a unha cuestión esencial e ver como Murguía se erixe no primeiro gran crítico da obra poética da súa muller e como, de xeito semellante a como sucede no caso de Pondal, algunha das súas opinións valorativas acabaron por constituír verdadeiros paradigmas da posterior crítica rosaliana. Non nos esquecemos, sen embargo, de darlle a importancia que ten á introducción de Emilio Castelar a Follas Novas, un dos mellores textos escritos sobre Rosalía. Para marcar unha posición sobre os paralelismos literarios das obras de Rosalía e Murguía, moi interesantes sen dúbida, remitímonos á opinión de Ricardo Carballo Calero, sustentada no seu revelador artigo ?Contribución ó estudo das fontes literarias de Rosalía?17. Dínolo grande polígrafo ferrolán que Murguía foi descubrindo pouco a pouco o xenio da súa muller, as súas aptitudes para a creación poética, superiores ás del mesmo e que, se nun primeiro momento e durante os primeiros anos do seu matrimonio, puido alentala súa vocación literaria, aconsellándoa ou corrixíndolle os textos, logo da publicación de C a n t a res gallegos, Rosalía tería en Murguía ?xa non un mestre, senón un admirador?. Podemos engadir nós que tamén dispuxo do seu mellor crítico, e non estaría de máis intuír un xeito de repartición que eles fan dos territorios creativos: para afastarse de calquera comparación con Rosalía, cando Murguía volva escribir poesía, fará poesía en prosa. Sabido é por todos que Manuel Murguía, daquela xornalista e escritor en Madrid, é o primeiro crítico de La flor, poemario co que Rosalía se estreou no mundo das letras en 1857 e que el comenta dun xeito entusiasta no xornal La Iberia, instalando a nova poeta nas coordenadas do romanticismo esproncediano. Cremos, sen embargo, que algunhas confusións das lecturas de Rosalía, como aquela que nos presenta a poeta como escritora sen pretensións e sen estudio, proceden das opinións que Murguía tiña sobre a primeira obra da súa muller. Pero imos cinguirnos, a dous textos do Murguía que admiraba e coñecía en profundidade a obra de Rosalía de Castro, e que era quen de sometela á lente de aumento dos xuízos críticos. O primeiro deles é a semblanza de Los P re c u r s o re s; o segundo é o substancioso ?Prólogo? que pon á fronte da segunda edición de En las orillas del Sar, nas completas de 1909.