BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
volta, en Ferrol, cunha estadía de dous días na cidade. Tanto se a Escola foi contratada pola empresa do Teatro Xofre, coma se ela mesma alugou o local, era a primeira vez que se apostaba forte polo teatro galego. O sábado 19 de marzo de 1904 estrearon Minia, tamén de Manuel Lugrís, e ao día seguinte repetiron A Ponte. En outubro dese mesmo ano, a Escola Rexional, con Manuel Lugrís como Presidente e Bernardo Jambrina como Director, representou na Coruña Minia, e estreou Mareiras, primeiro drama en tres actos do teatro rexionalista. Con esta nova obra Lugrís ía demostrar que, en contra do que dicían os que non vían con bos ollos que se crease un teatro galego, o público asistía sen problemas a unha función completa na lingua do país. Leandro Carré recoñecía nela a consolidación do teatro rexionalista:
Mareiras é unha das mellores obras do noso Teatro e foi a primeira que sinalóu o paso xigantesco dado pola Dramática Galega para o seu afincamento definitivo e para o seu perfeicionamento. Denantes de se estrenar esta obra coidaban todos que o púbrico non soportaría os tres actos d'un drama en galego. O trunfo outido por Mareiras veu demostrar que o interés sostense, como se sostivo neste drama intenso e poético, belo e humano (Carré Alvarellos 1923: 2)
Os coetáneos de Lugrís entenderon que este drama mariñeiro tiña como tema a cuestión relixiosa, o enfrontamento entre dúas visións do cristianismo, e quizais foi iso o que axudou a que Galo Salinas, afastado do grupo desde a escolla d'A Ponte, se reconciliase con eles, aínda que xa era tarde de máis para que a colaboración frutificase, porque, despois da marcha de Bernardo Jambrina a Madrid, a Escola Rexional desapareceu. A pesar da curta vida da Escola Rexional, a súa influencia, e sobre todo a de Manuel Lugrís, foi enorme. Como dramaturgo Lugrís creou escola e a súa obra A Ponte serviu de modelo a todos os escritores que arelaban influír na cuestión social a través do teatro. O primeiro en seguilo foi Antón Vilar Ponte, quen daba ao prelo, xa en 1905, o drama A patria do labrego; porén, onde maior foi a súa influencia foi na emigración. En Cuba, cando Plácido Lugrís facilitou un exemplar de Minia a Nan de Allariz, este publicou inmediatamente unha recensión en forma de peza dramática Por mor do drama Minia, ou Furto, xuízo e sentenza, en que o entusiasmo polo drama lugrisiano o levou a solicitar do dramaturgo coruñés que escribise algunha comedia. Como é ben sabido, Nan de Allariz era o nome artístico de Alfredo Fernández que, ademais de escritor, era un actor profesional, un tenor cómico que percorrera Sudamérica cunha compañía propia: de aí o seu interese en que se crease un repertorio de comedias galegas. Non obstante, tivo que ser el propio quen iniciase esa tarefa e, seguindo o modelo de Lugrís, fíxoo incluíndo sempre neles o elemento reivindicativo, a cuestión social, que era a gran preocupación das clases máis desfavorecidas. Despois de desaparecida a Escola Rexional, as actividades dramáticas en galego ficaron paralizadas até que, en 1908, Eduardo Sánchez Miño presentou en Ferrol a súa Escola Dramática Galega levando á escena, en xaneiro, no Teatro Xofre, Unha noite no
Nº 367 112