Estudos e investigacións sobre Manuel Lugrís Freire
BOLETÍN DA REAL ACADEMIA GALEGA
Manuel Lugrís debeu ser dos primeiros dramaturgos en responder a ese chamamento, porque súa foi a obra, A Ponte, que os rapaces de Sánchez Miño seleccionaron para a súa seguinte estrea. Este drama, que inauguraba o teatro de tese e o uso da prosa nos palcos galegos, foi estreado en xullo dese mesmo ano, 1903, e as críticas, tanto na prensa da Coruña como na de Santiago, foron moi boas, aínda que todos os xornalistas lamentaron que non houbese máis público. Uns felicitaban a Lugrís polo uso da prosa e a naturalidade da lingua, outros porque se atrevera a enfrontar directamente o problema do caciquismo e da cuestión social. Mesmo o anónimo comentarista de La Voz de Galicia consideraba que se o público fose obreiro os aplausos serían maiores, porque a cidade da Coruña vivira, en febreiro dese ano, unha folga xeral e a cuestión obreira estaba no centro da vida política e económica. Porén, a pesar do pouco público que asistira á estrea, os comentarios sobre a temática que trataba A Ponte deberon espertar unha grande expectación entre as clases traballadoras e mesmo entre as elites da cidade, xa que a reposición, realizada o 22 de novembro do mesmo ano, foi un verdadeiro acontecemento social. La Voz de Galicia citaba as personalidades que asistiran á función (todos os políticos da Coruña e a mesma Condesa de Pardo Bazán) e aseguraba que esa función fora a verdadeira estrea da obra, xa que o teatro estaba completo: abaixo as clases dirixentes, arriba as populares. Así foi como Manuel Lugrís obtivo o primeiro éxito do teatro galego. No entanto, a crítica de Galo Salinas na Revista Gallega foi moi dura. Discutiu os seus valores artísticos e morais, e mesmo chegou a propor un outro final en que o protagonista non tomase a xustiza pola man. Insistía Salinas en que el se limitaba a recoller as opinións dos que non compartían con Lugrís o entusiasmo pola causa obreira, e atribuía o éxito conseguido a que fora aplaudido por ?el pueblo?. Sería un erro pensarmos que Galo Salinas representaba o pensamento de todos os rexionalistas, pois Carré considerou que, por fin, con Lugrís o teatro galego alcanzara o ton acaído:
Gran conocedor [Lugrís] del tiempo y acción, el desenlace es hijo natural de los sucesos y desde los primeros momentos el espectador que va siguiendo con interés creciente el drama que se desarrolla ante su vista, comprende que no puede tener otra solución sino forzosamente la que le da el autor. Ese es el grandísimo mérito de Lugrís, así como el de la exposición y medio ambiente en que se mueven los personajes que crea, a los que transmite, y en los que da vida, a los nobles ideales de su corazón: el amor a la patria, a la justicia y a la humanidad (Carré Aldao 2006: 64).
En decembro, a Escola Rexional de Declamación levou a obra a Ferrol, que tamén vivía momentos de tensión social, e aí o éxito foi rotundo. Por fin, o teatro galego conseguía conectar co público, e o xornal local, El Correo Gallego, desfíxose en louvanzas a Lugrís e aos actores e actrices da Escola, mentres o correspondente de La Voz de Galicia insistía en que o público das localidades populares era o máis entusiasmado. Lugrís tivo que saír ao escenario despois de cada acto e acabou por chorar de emoción. Este entusiasmo tivo como consecuencia que a seguinte actuación da Escola se celebrase, outra
111 Nº 367