BOLETÍN DA REAL ACADEMIA GALEGA
Traballos de investigación e estudo
3. LOPE GALLO DE AVELLANEDA 1. Frei don Lope Gallo de Avellaneda foi comendador maior de San Antón de Castrojeriz (Burgos), cabeza das encomendas antonianas de España, Portugal e México, dende o 21 de marzo de 1586 ata 1607, ao suceder no cargo a seu tío Jerónimo Gallo, que gobernara a encomenda durante 26 anos. Con anterioridade fora cóengo en Santiago de Compostela, prebenda que tamén posuíra seu tío, o que lle permitiu un contacto directo con Galicia e coa súa lingua9. Ora ben, a relación de Lope Gallo de Avellaneda con Diego Sarmiento de Acuña non deriva desa estadía en Galicia, senón do parentesco entre don Lope e a segunda muller do futuro conde de Gondomar, dona Constanza de Acuña y Avellaneda. En efecto, dona Constanza é filla de don Lope de Acuña, capitán da cabalería española, e de Isabel de Lompré, dama flamenga sen rango social (García 1997: 53); herda o apelido Avellaneda da súa avoa paterna e por esta liña emparenta cos Gallo de Avellaneda. Ademais do parentesco úneos a afección polos libros, se ben non temos testemuños de intercambio epistolar nese terreo. A de don Diego é ben coñecida, e a mellor proba é a súa biblioteca. A de don Lope queda testemuñada no seu testamento, onde lembra que «en su librería existían muchos y buenos libros que habían sido de su tío el comendador», e onde dispón, despois de facer doazón dela á Orde, que «un religioso la catalogara y no se sacara ningún libro bajo graves penas» (Sánchez Domingo 2004: 255). 2. O primeiro parágrafo sitúa a Lope Gallo asinando a carta o 25 de xuño de 1596 no mosteiro de San Antón de Castrojeriz, xunto con Isabel de Rojas e os «ossos amados» do irmán desta, Diego Ochoa de Avellaneda, pois del son os restos obxecto do traslado de Madrid a San Juan de Ortega a que se refire a nosa carta10. No segundo parágrafo dá conta das súas actividades desde a última vez que estivo co destinatario da carta, probablemente a fins do ano anterior en Madrid11. Desde alí, «acabadas las partijas», seguramente as de Beatriz e Isabel ?respectivamente, esposa e irmá de Ochoa de Avellaneda12?, don Lope viaxa a Valladolid, a onde chega doente. Unha vez recuperado, no día de santo Antón Abade (17 de xaneiro) acode á voda dunha súa sobriña; logo recibe noticia da morte «del coronel», e asiste á voda do fillo maior deste13. De volta na súa casa de San Antón, en Castrojeriz, a primeira semana de coresma (de 3 a 9 de marzo, Cappelli 1930: 82) ocúpase nos preparativos para a asistencia ao capítulo que a orde celebra en Toledo «en onze de mayo del año de mil y quinientos y noventa y seys» (Suarez 1603, fol. 197v); supomos que desde alí viaxaría directamente a Madrid, desde onde emprende, coa súa tía Isabel de Rojas, o traslado dos «huesos de nuestro santo tío». Tras unha viaxe dificultosa por causa das chuvias14 llegan a San Antón «víspera del Spíritu Santo», é dicir, o 1 de xuño (Cappelli 1930: 83). Outras cartas do epistolario de Gondomar axúdannos a completar o itinerario do defunto Diego Ochoa de Avellaneda; así, por carta de Diego Morán temos datos dun alto en Valladolid o día anterior á chegada a San Antón:
Nº 366 238