BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
CARACTERÍSTICAS XERAIS DO TEATRO DE LUGRÍS FREIRE A xeito de sistematización, cremos que podemos estabelecer a partir da análise dos textos algúns dos trazos constantes na súa escrita teatral tamén presentes noutros niveis da súa actividade cultural. Estas características particularizan o seu labor dramatúrxico, explicando así as razóns da enorme significación que coñeceu no momento da súa produción e representación, e indo máis alá, na historia do teatro galego. Algunhas das que explicamos máis pormenorizadamente son propias da dramática rexionalista (Vieites 2003: 201203), como a oposición estabelecida entre o mundo urbano e o rural, a liña esencialista baseada na procura dunha dramaturxia popular, a recreación da fala popular, ou unha certa dimensión social e crítica; pero resultan pertinentes tamén outras que Vieites describe como unha certa ?deriva popular e populista? ou a presenza de elementos propios do melodrama (íb.) e que non son obxecto de análise particularizada neste traballo. LIGAZÓN ENTRE O TEATRO REXIONALISTA E NACIONALISTA Unha das características sinaladas recorrentemente polos estudosos deste conxunto de obras (Pillado Mayor 1991: 4445, Rabuñal 1994: 68, López 2006b: 34) é o seu carácter de transición, de ponte entre o teatro do período do Movemento Dramático Rexionalista e o Movemento Dramático Nacionalista. Concordamos plenamente con estas consideracións, sendo conscientes de que nomeadamente no caso d'O Pazo e mais da Estadeiña, falamos dos primeiros banzos colocados na construción dramática da nova etapa, escritos polo gran dramaturgo do teatro rexionalista, abrindo ao lado do activo Villar Ponte o segundo período de esplendor deste xénero en lingua galega. CARÁCTER INNOVADOR DA DRAMATURXIA LUGRISIANA Dentro de toda a súa obra dramática, deberemos concordar co traballo da profesora Laura Tato (2006c) cando apunta a que, para entendermos a súa verdadeira valía, cómpre botar unha ollada ao panorama teatral da época. Lugrís Freire insírese na nómina de autores que desde a emigración souberon conectar co público a través da utilización de temas e rexistros de carácter popularizante e oralizante, inaugurando xa desde a escrita d'A costureira d'aldea unha nova vía que dará algúns dos máis valiosos e significativos froitos do teatro rexionalista (Tato 1999: 42). Así, esta mesma profesora indica xa sobre A costureira d'aldea que presentaba interesantes trazos anovadores:
Lugrís introducía unha serie de elementos que resultaban novidosos en relación ao teatro que na altura escribían os rexionalistas do interior, pois, ademais de prescindir da verosimilitude facendo que o personaxe madrileño, Prácido, fale galego, tamén introduce o elemento reivindicativo. (2006a: 48)
Para alén diso, lembremos as innovacións que destacaba para pezas que aquí incluímos na segunda etapa, tanto por teren abandonado a liña culturizante dos dramas históricos anteriores ?A torre de Peito Burdelo (1891) de Galo Salinas, Pedro Madruga (1897)
Nº 367 90