BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
unha das características textuais diferenciadas da peza é o coidado posto na descrición dos lugares, principalmente na didascalia que abre a peza:
A escena representa unha eira, con palleiro, cabazo, un feixe de molime, trebellos de labranza, etc. Arboreda no fondo, e no cume d'un couto seria comenente que se vira un pazo gallego.
É fácil adiviñar que o pazo sinalado é, por tanto, un símbolo fundamental na construción da peza, un espazo recuperador da paisaxe, un monumento que transmitirá moito máis ca unha clase social: será o elemento definidor da comunidade e a entidade inmóbil que contemple a relación que se estabelece entre a labrega María, e Pedro ?o fillo do Fidalgo retornado de Cuba un ano antes?, os verdadeiros integrantes da comunidade. Non é esta a primeira vez que Lugrís utiliza a paisaxe como símbolo de Galiza, como ocorre co poema de Soidades ?Ô castelo d'Andrade?, onde ?contrapón a admirativa contemplación das románticas ruínas e o seu carácter de símbolo de opresión das liberdades galegas? (López 2006b: 32). Neste mesmo poemario dedica un poema a Pardo de Cela, figura que xa viña sendo obxecto de recoñecemento por parte doutros autores da época en Galiza (Ogando 2004, Ínsua López 2005), personaxe ao que tamén ficaría asociada como símbolo metonímico a Torre da Frouseira, exaltación espacial que coñecerá un dos seus cumes n'O Mariscal de Cabanillas e Villar Ponte. Este último estaría moi ligado á recuperación de Lugrís Freire para a escrita dramática. Noutra orde de cousas, sorprende en certa medida, como indican os estudosos, o ton amábel e a visión positiva con que Lugrís trata nesta obra as figuras dos ricos e mesmo dos castelanizados. Se Pillado Mayor (1991: 143 e ss.) sinalaba na situación histórica, coa revolución rusa como pano de fondo, un posíbel factor de moderación na mensaxe ideolóxica transmitida polo autor, parécenos máis atinada a idea apuntada por Tato (1999: 74) da necesidade subxacente de crear un argumento propicio para reflectir a posibilidade de construír unha sociedade nova, a partir dunha relación establecida entre os ?enxebres?, nunha realidade que transcende as diferenzas de clase. Así pois, seméllanos moi apropiada a coincidencia que Teresa López (2006b: 36) recoñece entre este texto e algunhas das novelas de Otero Pedrayo (a partir do traballo de Fernández PérezSanjulián 2003), onde a narrativa sentimental serve de metáfora dunha posíbel e incipiente nación, característica habitual nas narrativas fundacionais descritas nos procesos de independencia dos países americanos (Sommer 1997). Noutras palabras, concordamos coa idea de que a ?comuñón co pobo [dos fidalgos], plasmada na unión coa muller labrega fiel á súa terra e ás súas tradicións, a nai galega, realizarase ese ideal de rexeneración (...) A unión das clases está subordinada á difusión e ao triunfo dun ideal: o da causa nacionalista.? (2006b: 36). Noutras palabras: o dunha nova comunidade nacional. Estadeiña. Comedia en duas xornadas en prosa, aparece na edición Terra a Nosa, na Coruña en 1919. A acción transcorre tamén en ?época actual? e ?nun porto de mar das
Nº 367 88