BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
a súa nai na que se conta ao público o resultado da pelexa. (...) Paulos e Carmela pensan casar ao día seguinte, mais as esixencias monetarias do párroco, D. Perfeuto, están dificultando moito que a voda se celebre (...) A súa desesperación [de Paulos] é tan grande que decide botarse ao mar, a pesar do mal tempo, para pedir axuda ao seu padriño que vive na outra banda da ría. Debruzada na xanela, Carmela vai contando como sae a barca e como a traga o mar. Cae o pano sobre a súa desesperación e as maldicións contra o mar; maldicións que D. Amaro considera que deben caer sobre quen obrigou a Paulos a se botar ao mar malia a mareira. (Tato 1999: 54)
Porén, Tato e o resto dos estudosos desta peza (Pillado Mayor 1991: 112, Rabuñal 1994: 723 e 2006a: 51, Abuín e Ruibal 2006: 20), sinalan que en realidade, malia ser esta a trama discursiva máis evidente, a antítese creada entre os dous cregos é o elemento máis importante e igualmente o máis interesante. De feito, é especialmente reveladora a observación de Tato (2006c) ou Vieites (2006a: 98), na esteira de Pillado Mayor (1991: 114), sobre a perspectiva adoptada por Lugrís, xa que nos indica que a recepción por parte doutros rexionalistas debía ser semellante, considerándoa como unha crítica desde unha perspectiva cristiá dos malos comportamentos dalgúns colectivos eclesiásticos:
Os coetáneos de Lugrís entenderon que este drama mariñeiro tiña como tema a cuestión relixiosa, o enfrontamento entre dúas visións do cristianismo e quizais foi iso o que axudou a que Galo Salinas, afastado do grupo desde a escolla d'A ponte, se reconciliase con eles, aínda que xa era tarde de máis para que a colaboración fructificase, porque despois da marcha de Bernardo Jambrina a Madrid, a Escola Rexional desapareceu. (Tato 2006c)
Esclavitú. Drama en dous actos en prosa aparece en 1906 editado na Coruña pola ?Libreiría Rexional de Eugénio Carré?. De todo este grupo é o único drama non representado con anterioridade á súa publicación, xa que a Escola Rexional de Declamación detén xustamente as súas actividades pouco antes da conclusión da peza, polo que o ritmo escritaescena que coñeceran os tres anteriores dramas de Lugrís fica interrompido. Aínda así, a peza sería estreada en setembro de 1910 no teatro Pardo Bazán da Coruña polo grupo da Sociedade Talía, e sería representada tamén nos anos 1916 e 1917 polo Cadro de Declamación do Centro Jaimista da Coruña e mais o grupo Ensaio de Compañía CómicoDramática (Rabuñal 2006b: 57). Contamos desta vez con seis personaxes, Esclavitú, Pilara e Crisanto que teñen exercido o papel de pais adoptivos da rapaza, Cidre e Román, os fillos deste matrimonio e mais o elemento negativo, o andaluz Toribio. O argumento é resumido así no traballo de Anxo Abuín e Euloxio R. Ruibal:
Esclavitú é unha orfa que vive «melancónica» e con «saudade» na casa de Pilara e Crisanto, o mestre do lugar. Sabemos que o fillo destes, Cidre, é o prometido de Esclavitú, que debeu marchar a Guerra en Cuba porque o «andaluz» Toribio pagou con diñeiro a exención do servizo a El Rey. Cando comeza a obra, Cidre está a punto de voltar, pero iso non remedia a tristura de Esclavitú, que agacha un segredo descuberto por fin no segundo acto: grazas a un bebedizo, Toribio roubou a súa honra, impedíndolle
Nº 367 84