BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
máis interesantes de toda a obra de Lugrís, achegando ideas de ton moito máis progresista do que se poderá recoñecer en textos posteriores.
ANTÓN: (...) Eu sonlle franco, compradre. A fe fuxeu de min e non quero axionllalo corpo cando a alma está direita. Comprendo que para algús espíritus, que non poden vere a lus da razón, non é malo ter unha idea en certas cousas, e matan as saudades de xusticia coa esperanza de iren ó ceo. Pero eu sei que para ser home de ben non é mester rezar nin dar cartos ós cregos. Na Cruña leín moitos libros e papés, e despertouse na miña cabeza unha idea nova, que para min é a verdade. Vosté cree, e debe entrar na igrexa. ¡Eu non creo, e se entrara sería un hipócrita! (1996 [1903]: 182)
Cremos que, máis alá de anticlericalismo, se trata realmente de ateísmo no caso de Antón, na crenza só da redención do home a través do home e do seu traballo, do seu esforzo e conciencia. Como veremos, no caso de Mareiras podemos falar só dun parcial anticlericalismo, mentres o elemento que, na derradeira peza do teatro lugrisiano, condiciona o nonprogreso de Galiza é a súa permanencia na ignorancia e na superstición, ou o esquecemento dos seus trazos diferenciais, pero non un problema coa xerarquía eclesiástica ou cuestións doutrinarias. Minia. Drama nun acto en prosa, publicado pola ?Imprenta y Fotograbado de Ferrer?, no ano 1904, coñeceu dúas edicións anteriores a 1936: unha datada en 1919 na Coruña e mais outra sen datar que apareceu publicada pola Imprenta Roel, igualmente da Coruña (Pillado Mayor 1991: 19). Foi representada ?por primeira vez con grande aprauso no Teatro Jofre de Ferrol o 19 de Marzo de 1904 (Lugrís Freire 1904a: 3). Desta vez o texto aparece dedicado a ?D. Luciano Marchesi Buhigas, en siñal d'amistade e grande estima?. Esta peza presenta sete personaxes, dos que se individualizan nominalmente a cinco, caracterizados pola idade: Minia, a protagonista que lle dá nome ao drama, de vinte e seis anos e mais o fillo, Fiz, de oito anos; Martiño, campesiño de trinta anos, namorado de Minia que tenta axudala dándolle refuxio do cacique Reinaldo, tamén de trinta anos, na casa da tía Xuana, de corenta. A acción, aínda que non localizada de maneira explícita, sitúase nas Mariñas de Betanzos, como se pode ver na nota que describe o vestiario (Lugrís Freire 1904: 6). O espazo físico concreto é a casa da tía Xuana que ten o aspecto da casa dun ?labrego ben acomodado? (ib. 7). Como apunta Tato (1999: 52) con este drama ou autor encamíñase outravolta pola beira social:
Minia vive agachada co seu fillo na casa dunha amiga debido a que teme pola vida do pequeno. Cando nova, Minia entrou a servir na casa dun fidalgo e foi seducida polo vinculeiro, que non casou con ela, mais recoñeceu a Fiz. Agora, despois de varios anos, o segundoxénito, Reinaldo, quere facerse co sobriño para poder herdar o seu irmán que morreu en Cuba. O público sabe disto na primeira escena, por unha conversa entre Xuana e Martiño, que tamén informa da última maldade de Reinaldo: está intentando encerrar a Minia en Conxo para ficar coa custodia do neno. Nas escenas sucesivas entre Minia e os seus amigos fica patente a angustia e desesperación da rapaza e o amor que por ela sente Martiño. Unha vez soa, Minia recibe a visita de Reinaldo, que lle
Nº 367 82