BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
En calquera caso, nun nivel de análise total do conxunto, A costureira d'aldea demostra a clara consciencia que este dramaturgo tiña desde o inicio da súa escrita sobre o poder mobilizador do teatro (Vieites 2006a: 63), facultade que aproveita para exaltar a Galiza e os galegos9, a lingua, e a harmonía das comunidades campesiñas ameazada polo efecto corrompedor do foráneo. De Galicia á Lavapiés Texto non conservado de que dan noticia Campos Villar (2000: 1314) e Teresa López (2006a: 16 e 2006b: 22 e ss.) Aínda sen coñecérmola, os datos achegados por López revelan que a peza foi o resultado da reacción que Lugrís Freire, como toda a comunidade galega, tivera ante a representación da obra De Lavapiés á Galicia, espectáculo en que, unha vez máis no teatro desa época, os personaxes galegos se caracterizaban de maneira negativa. O texto de Lugrís invertería a situación colocando no papel dos pailáns os non galegos, aspecto temático que en opinión desta mesma investigadora sería común ás dúas obras escritas na Habana, xa que a ?afirmación de Galiza, da lingua galega e dos galegos presente n'A costureira completaríase probabelmente coa crítica dos costumes e valores do Madrid castizo, representado por Lavapiés?... (2006b: 25). Como apunta Tato (1999: 43) con A Costureira d'Aldea aparece claramente a faceta reivindicativa sobre os galegos e Galiza. Este enxalzamento continúa, polo que indican os datos, na elaboración de De Galicia a Lavapiés e, posteriormente, ao longo de toda súa obra. Nestas dúas pezas, a afirmación galega constrúese mediante o enfrontamento a un opoñente ridículo, o madrileño/español que parece máis ben encarnar a figura do pelele, do pailán que pode ser derrotado polos galegos. Outros trazos comúns das pezas serían precisamente ese carácter cómico e a utilización da oposición GalizaMadrid como eixo estruturador da acción. 2. A ETAPA DA ESCOLA REXIONAL DE DECLAMACIÓN É sabido que, uns anos despois do seu regreso a Galiza, Manuel Lugrís Freire protagoniza unha das etapas máis fecundas e significativas do teatro galego: a do Movemento Dramático Rexional, principalmente mediante a fundación da Escola Rexional de Declamación (1903), compañía que estreará tres dos catro dramas que elabora neste período10. A relevancia da figura lugrisiana é xa patente se consideramos que A Ponte, a primeira das súas obras levadas á escena pola Escola, marcou un fito fundacional da literatura galega ao ser o primeiro texto teatral longo en prosa. Pero en xeral todas estas obras converten a Lugrís Freire no primeiro gran dramaturgo da nosa historia dramática. A Ponte. Drama en dous actos en prosa. Dividido en tres cuadros aparece en 1903 na Coruña na Tipografía ?La Constancia?, incluíndo a nota ?Representada por primeira vez no Teatro Principal da Cruña o día 18 do mes de Santiago de 1903? (Lugrís Freire 1903: 3). É sen dúbida o texto máis valorado e coñecido de Lugrís Freire ao longo da historia
Nº 367 80