BOLETÍN DA REAL ACADEMIA GALEGA
Estudos e investigacións sobre Manuel Lugrís Freire
Por esta razón, non debemos deixar de celebrar o labor de restitución que se veu facendo, por parte de estudosos e interesados na época ou no xénero, ao longo deste ano dedicado ao escritor sadense para celebrar o Día das Letras. E, a risco de pouco novo poder dicir para alén destas contribucións sobre a figura lugrisiana, queremos aproveitar todas estas informacións para realizar un breve panorama sobre a súa obra dramática, as súas características e os seus significados no mapa cultural e teatral galego daquela altura. O TEATRO DE LUGRÍS FREIRE: TENTATIVA DE DESCRICIÓN Son dez os textos teatrais lugrisianos dos que temos noticia, aínda que destes hai un, De Galicia á Lavapiés, do que só se conserva unha pequena referencia, como veremos na descrición da primeira etapa da obra dramática de Lugrís. Esta obra foi pensada ou realizada na Habana, onde o autor escribe tamén A costureira d'aldea, peza só moi recentemente publicada, polo que en moitos dos estudos anteriores a 2006 só era posíbel unha alusión rápida, pero non unha análise demorada. Outrosí existen outras dúas obriñas, Ir por lan e La ofrenda, o los folletos verdes de Don Pepiño, ambas de moi breve extensión e publicadas nunha obra narrativa, os Contos de Asieumedre, razón pola que non sempre foron considerados de interese ou de carácter dramático. Volveremos sobre este asunto. Contamos en realidade con sete obras de entidade no conxunto, e desas sete só seis teñen sido obxecto de análise até época moi recente, sendo neste ano 2006 cando aparecen as primeiras achegas importantes sobre a obra en conxunto. Deste xeito, parece que por fin agora se crearon as condicións para dar conta da totalidade da obra do autor sadense ?a excepción, claro está, da devandita De Galicia á Lavapiés, coa saída á luz d'A costureira d'aldea. Por esta razón, seméllanos posíbel propormos unha nova estruturación da escrita dramática de Lugrís en tres etapas ou fases. Cada unha destas etapas presenta, na nosa opinión, características comúns coas outras, mais tamén trazos propios dominantes, en xeral debidos ao contexto sociohistórico en que o autor desenvolve a obra, que as singulariza. Obviamente, é esta unha primeira proposta que poderá ser corrixida ou rebatida, mais pensamos que existen algúns datos que permiten sostela. Vexamos así pois cada unha destas fases, as pezas que as conforman e os seus riscos correspondentes. 1. A ETAPA CUBANA Como indica o mesmo epígrafe, entrarían nesta etapa os textos escritos ?aínda que non publicados? durante a súa estadía en Cuba. Resulta facilmente deducíbel que o factor socioxeográfico da emigración é moi importante nas características e outrosí nas innovacións temáticas desta produción, mais dificulta así mesmo a chegada e difusión destes textos en Galiza (Tato 1999 e 2006a; Vieites 2006a).
Nº 367 78