BOLETÍN DA REAL ACADEMIA GALEGA
Alocucións académicas sobre Manuel Lugrís Freire no Día das Letras Galegas
Rafel Dieste, Roberto Blanco Torres, Avilés de Taramancos, Lorenzo Varela e Manuel Lugrís Freire. Isto dános a medida do que significou e significa inda hoxe o chamado Novo Mundo para a nosa cultura. Da outra banda do Atlántico chegaron a Galicia a bandeira, o himno, a Academia, trescentas escolas e moitas outras realidades tanxibles e entrañables. Non o esquezamos. Chegounos tamén a referencia da obra múltiple dos trasterrados, da Galicia de alénmar que seguiu crecendo e dando fe da súa existencia entre propios e alleos; Galicia transcendida, universal, avanzando por todos os camiños, mentres no seu territorio reinaban o escurantismo e a represión, que de todo padeceu este país en diferentes etapas do seu existir. Estamos no ano da Memoria Histórica e xusto é que recordemos ós homes e ás mulleres que tiveron que marchar para gañar a vida ou salvar a vida. Recordemos ós tantos e tantas que levaron en alto a bandeira da dignidade de Galicia mundo adiante. En boa medida debémoslles a realidade institucional, social e cultural de hoxe en día. O sadense Manuel Lugrís Freire foi un deles. Descubriu o seu país estando lonxe del e converteu a saudade en enerxía creadora. Trece anos fóra, añorando, cavilando e traballando, fecundaron e marcaron de por vida a acción deste apóstolo da causa nacionalista. É xusto que o recordemos precisamente neste ano do centenario da Academia. E ademais é xusto que o fagamos nesta terra, neste lugar do Castro de Samoedo, no Museo Carlos Maside, que tamén é obra de emigrantes.
Nº 367
130