Alocucións académicas sobre Manuel Lugrís Freire no Día das Letras Galegas
BOLETÍN DA REAL ACADEMIA GALEGA
Dios lle dea a Chumín de Céltegos e ós que traballan en ela, sorte abonda, moita vida e todolo que les queiran.
Pasado un tempo, Lugrís afastouse do periódico, que seguiu só a cargo de Armada Teixeiro. Tense especulado sobre a causa posible daquel distanciamento e tamén do que o levou a arredarse un algo de Álvarez Insua. Talvez fosen razóns ideolóxicas. Armada e Insua eran máis ben conservadores e el estaba na liña rexionalista de Murguía e Pondal. Máis alá das ideas tivo algúns desencontros, sobre todo con Armada, por mor dunhas recensións que desagradaron. Na Habana nace a sociedade Aires da miña Terra, da que Lugrís é o principal impulsor, e coautor dos estatutos da mesma. Era un xeito de homenaxe a Curros Enríquez, a quen admira fondamente. Integra a Xunta directiva e logra que, por aclamación, o poeta de Celanova sexa nomeado presidente de Honra. Colabora no boletín mensual do mesmo nome, xunto con Emilia Pardo Bazán, Sofía Casanova, Álvaro de la Iglesia e outros. A entidade mantén certas discrepancias co Centro Galego. A costureira d'aldea é a primeira obra teatral de Lugrís. Escribiuna en Cuba, e foi ensaiada, pero non existe constancia clara de que fose levada á escena. En 1894 chega á Habana Curros Enríquez. Lugrís corre a abrazalo. Sente por el unha grande admiración. Tíñanse cruzado algunha carta. Curros tenlle aprecio. E inda que non é mester do seu agrado prológalle o poemario Soidades, o único libro que o sadense publica en Cuba. A amizade entre eles será de por vida. Teñen camiñado xuntos pola cidade. Lugrís era o guía. Íalle mostrando rúas e palacios, monumentos, parques e as vellas fortalezas do Morro, da Cabaña, de Atarés. Tamén se encontraban na casona de Prado e Dragones, sede o Centro Galego, na que con frecuencia coincidían con Chané, Nan de Allariz, Constantino Anel, Fontenla Leal, Pepe de Xan Baña, Xan de Masma... Cuba foi para Lugrís unha referencia perenne. Retornou a Galicia en 1896. Os trece anos que alí estivo foron intensos, definidores. Alí descubre a singularidade de Galicia e dedícase a estudala e a enxalzala. Foi, sobre todo, un fervoroso defensor da nosa lingua. Volve ó seu país (como el recordaría anos máis tarde) cun libro de versos, Soidades, prologado por Curros, unha colección de A gaita gallega e o manuscrito da peza teatral A costureira d'aldea. E algo máis: volve casado cunha fermosa muller cubana: Concepción Orta. Van alá corenta e tres anos dende que se instituíu o Día das Letras Galegas. Corenta e tres homenaxes a figuras senlleiras da nosa literatura. O trinta por cento, ou sexa, doce nomes pertencen a escritores emigrados ou exiliados ?que vén ser case o mesmo? que fixeron obra en América. Nomes como Curros Enríquez, Castelao, Ramón Cabanillas, Antón Villar Ponte, Celso Emilio Ferreiro, Eduardo Blanco Amor, Luís Seoane,
129 Nº 367