BOLETÍN DA REAL ACADEMIA GALEGA
Alocucións académicas sobre Manuel Lugrís Freire no Día das Letras Galegas
Cuba vivía unha etapa de relativa paz entre dúas guerras pola independencia. A que rematara en 1878 que deu lugar ó Pacto do Zanjón (un pacto que Antonio Maceo e outros líderes cubanos consideraban unha rendición), e a que se iniciaría en 1895, organizada por José Martí. Había no país unha grande efervescencia política e tamén algúns estalidos insurreccionais como os de Holguín e Santiago de Cuba, e o desembarco de Limbano Sánchez, todos eles abortados polas forzas represivas. Na Habana creouse un Club Central Revolucionario. Os gobernadores deixaran de chamarse capitáns xenerais pero seguían sendo militares. No terreo económico aparecen melloras tecnolóxicas no sistema de produción de azucre e multiplícase o cultivo do tabaco. E inda que continuaron explotados, os escravos fóranse convertendo en traballadores libres asalariados. Na Habana circulaban tranvías e comezaba a expandirse o alumado eléctrico. Tal é o ámbito en que se move o emigrante sadense. Pero hai ademais un ámbito especificamente galego. Xa existían a Sociedade de Beneficencia dos Naturais de Galicia e o Centro Galego. Rosalía de Castro fora nomeada Socia de Honra de ambas as entidades. Creárase o Orfeón Eco de Galicia. Alexandre Chao (antigo compañeiro de Manuel Murguía no xornal vigués La Oliva) fundara na rúa Obispo o establecemento La Propaganda Literaria, e en 1880 publicara Follas Novas, de Rosalía, que a autora dedicara aos galegos de Cuba. Este poemario, xunto con Cantares Gallegos, vendíase nas librerías da Habana. A emigración galega ía a máis. Multiplicábanse as actividades culturais e sociais. Estamos en 1885. Lugrís ten vinte e dous anos de idade e un prestixio ben gañado polos traballos literarios e a súa actuación pública. O ferrolán Xosé Novo funda o semanario Galicia Moderna, no que o sadense comeza a colaborar. Novo e Lugrís convocan unha subscrición popular para erguerlle un mausoleo a Rosalía en Iria Flavia. Reúnense achegas de 1130 paisanos emigrados. En carta asinada por ambos comunícanlle a Murguía que poñen á súa disposición a cantidade recadada. O 5 de xullo dese ano ve a luz o primeiro número de A Gaita Gallega, que Lugrís funda xunto co ortigueirés Ramón Armada Teixeiro. Asinan respectivamente cos pseudónimos de Roque d'as Mariñas e Chumín de Céltegos. Trátase dun periódico mensual de pequeno formato, que leva o título do coñecido libro de Xoán Manuel Pintos, que se publicara en Pontevedra trinta e dous anos antes. Evidentemente é unha semellanza deliberada e non só no título. Onde Pintos divide o seu traballo en ?foliadas?, o periódico habaneiro faino en ?tocatas?. Tivo moi boa acollida en toda Cuba. Vimos notas sobre a súa presenza en xornais de Güines, Cienfuegos, Matanzas, e en Constitución, de Remedios, ata o saúdan en vesos galegos:
Por aquí tamén falamos a lingua da nosa Suevia. ¡Canto ben nos fan as cousas que fala a Gaita gallega!
Nº 367
128