BOLETÍN DA REAL ACADEMIA GALEGA
Estudos e investigacións sobre Xosé María Álvarez Blázquez
O título desta conferencia, que por certo creo ben xustificado, é «o editor revolucionario». Considero que este cualificativo se lle debe aplicar a Xosé María Álvarez Blázquez sobre todo pola segunda etapa de Edicións Castrelos, pero aínda así parece necesario, xa que tanto nos entretemos en prólogos, falar tamén da súa fermosa, e historicamente importante aínda que non tanto, fermosa empresa de Edicións Monterrey, que levou adiante en sociedade co bo Luís Viñas Cortegoso. Ora ben, teño que dicir unha cousa: non me gusta esa visión xeral, tan parcial e tan esencialmente falsa, de Álvarez Blázquez como editor de xoias bibliográficas, aínda que tamén o fose en Monterrey, onde talvez unha boa parte desta ourivería tamén lla habería que atribuír ó Viñas que, como dixo antonte o Ferrín, levaba tinta de imprenta nas veas. E teño que recoñecer que unha pequena parte da culpa desta imaxe pode ser até miña, pois un vello relato meu, puramente literario e mítico, titulado Anos de aprendizaxe, fala dun mestre que é unha especie de ourive construtor de obxectos de poder especialmente fermosos que algúns identificaron ?e con toda a razón? co meu mestre Xosé María. Pero aínda que Xosé María foi un bibliófilo e lle gustaba editar fermosos libros, a súa concepción xeral do libro galego era diversa, como xa se viu e como seguiremos vendo. En realidade, Edicións Monterrey foi unha editorial minoritaria, máis ou menos «para bibliófilos», porque daquela tampouco non había sitio pra outra cousa. Pero antes de meternos en 1949 imos volver un pouco atrás, a antes de 1936. Quen hoxe se atope de pronto coa imaxe do poderoso florecemento, sobre todo cualitativo, da literatura galega, e en xeral da palabra galega escrita, nos anos que van desde a fundación das Irmandades da Fala a 1936, e especialmente na década anterior a esta data, seguramente que imaxinará unha considerable industria editorial naqueles anos. Equivocarase gravemente, porque en realidade as coleccións Céltiga e Lar ?pioneiramente monolingües? foron empresas moi modestas, cunha vocación popular que non chegou a callar, e cualitativamente bastante por baixo do que fora a Biblioteca Galega de Martínez Salazar no cambio de século. Despois a cousa melloraría un pouco, grazas ó voluntarismo e entusiasmo patriótico de Ánxel Casal, home providencial prá cultura galega naqueles intres decisivos; pero a situación seguiu sendo, en realidade, de extrema pobreza. Dende 1927 ata 1936 en Galicia só hai unha editorial que mereza ese nome, as Edicións Nós do Ánxel Casal, que publicaron case todo o mellor daqueles tempos nos que floreceron Manuel Antonio, Amado Carballo, Cunqueiro, Vicente Risco, Rafael Dieste, Otero Pedrayo, Castelao... Foron algo máis de setenta libros, o cal, na perspectiva da época, non está mal. Pero as edicións eran ridiculamente pequenas, da orde dos douscentos e trescentos exemplares, e raramente cincocentos ou máis. Neses dez anos de edición, Ánxel Casal non fixo máis de 30.000 exemplares de libros, ou sexa, 3.000 por ano de media, ou sexa, en total, nos dez anos, un libro ?un exemplar de libro? por cada cen galegos. É dicir, unha gota de auga no mar. E ademais, non se vendían nada ben. Imprimíanse centos e vendíanse ducias, iso é ben sabido, non insistirei agora. O pobo galego, que falaba galego, que
Nº 369 102