Traballos de investigación e estudo
BOLETÍN DA REAL ACADEMIA GALEGA
ron man deste artigo para obter material de recheo co que completar a caixa de impresión das catro páxinas do prego. Evidentemente é unha cuestión que, á falta do manuscrito orixinal d'Ó Apóstol Santiago, non estamos en condicións de resolver. 4. A PUBLICACIÓN DO TEXTO Sabemos, polo pé de imprenta (Santiago: Imp. de EL DIARIO, San Francisco núm. 9), que o prego que estamos a estudar se deu a lume entre os anos 1876 e 1878. Revisando a colección do Diario de Santiago13 (18721878) puidemos comprobar que o xornal compostelán trasladou as súas dependencias ao número 9 da rúa de San Francisco o 1 de xaneiro de 1876, e que se mantivo neste enderezo ata a súa desaparición, o 30 de decembro de 1878, cando deu paso a unha nova cabeceira, a Gaceta de Galicia14. Non nos é posible, polo de agora, ofrecer unha data máis precisa da súa saída do prelo. É evidente que as causas que motivaran a escrita d'Ó Apóstol Santiago a comezos do século XIX non podían ser as mesmas ca as que estaban detrás da súa publicación pasados máis de setenta anos, unha vez que quedara abolido o Voto de Santiago de maneira definitiva en 1834. Cremos que na decisión de recuperar o vello manuscrito puideron confluír varios factores. Por unha parte, debeu de ser unha razón importante para os seus editores o feito de que o texto estivese escrito en galego. Aínda que o Diario de Santiago non destacou especialmente por incorporar textos galegos nas súas páxinas15, si tomou parte na polémica xurdida a raíz da proposta de El Heraldo Gallego, feita en decembro de 1876, de promover o uso do galego na prensa do país. O 5 de febreiro de 1877 o Diario de Santiago publicaba na súa portada un editorial apoiando a iniciativa do xornal ourensán, algo ao que non debeu de ser allea a amizade que mantiña Alfredo Vicenti con Valentín Lamas Carvajal16. Pero Ó Apóstol Santiago tamén contaba cun contido atractivo. A obra ofrecía un compendio das principais lendas xacobeas a través dunha prosa sinxela ?aínda hoxe resulta amena e instrutiva a súa lectura?, e isto nun momento en que a igrexa compostelá procuraba revitalizar o culto ao Apóstolo Santiago17; sabemos que desde a súa chegada á arquidiocese, en febreiro de 1875, o cardeal Miguel Payá y Rico mantivo unha boa relación co Diario de Santiago, chegando mesmo a converterse en colaborador do xornal (Durán 2001: 43). Se cadra foi este entendemento coas esferas eclesiásticas ?truncado radicalmente algún tempo despois? o que levou a Manuel Bibiano Fernández a dar saída do prelo a algúns textos de contido relixioso, entre eles a Ó Apóstol Santiago18, cos cales se contribuiría á causa da devandita revitalización do culto xacobeo impulsada polo cardeal Payá. E, por suposto, a produción deste tipo de obras efémeras e de baixo prezo facíase tamén, ou fundamentalmente, con fins comerciais; non cremos que Ó Apóstol Santiago fose unha excepción a isto que dicimos.
249 Nº 367