MANUEL MURGUÍA
109
a vocación centralista da maior parte dun nacionalismo español que empeza a ollar con lupa e a combater calquera manifestación, por pequena que fose, que puidese poñer en dúbida a pretensión de unicidade, agora tamén orgánica, da nación española. E o provincialismo, por reacción, ten que afirmarse tamén máis. Tal fará, entre outras publicacións periódicas, La Ilustración Gallega y Asturiana, dirixida por Murguía, que insiste nas mesmas cuestións, especialmente no cunerismo caciquil e no atraso. E así, o 10IV1879, amén de considerar que a conclusión do ferrocarril do NO é un dos principais problemas de Galicia, aconsella ós seus lectores que, ante as próximas eleccións, os galegos, con independencia dos partidos, ?elijan en primer lugar a los hijos del país, prefiriendo siempre y poniendo por delante á todos aquellos que le honran por sus dotes y talento, por su carácter ó por sus servicios en favor de la tierra natal?. En todo caso, nin Murguía nin ninguén dentro do tardoprovincialismo elabora nada que se poida chamar programa político ou proxecto completo de futuro. Xa na fase rexionalista, Murguía, e con el o rexionalismo liberal, fai unha análise dos problemas de Galicia que parte de dúas premisas: 1ª) Galicia, rexión desatendida e oprimida, sofre un longo proceso de desnaturalización cultural e sometemento político; e 2ª) Galicia ten unha constitución esencialmente campesiña e mariñeira que manifesta un acusado arcaísmo e atraso económico. Isto último lévaos a centralas súas preocupacións no mundo rural e induce neles unha relativa indiferencia para coa situación dos obreiros urbanos, pero non tanto por clasismo senón por entenderen que, alomenos de momento, o proletariado era algo bastante alleo ó universo galego. Leandro Saralegui, o galeguista decimonónico de formación económica máis sólida, é un dos poucos que percibe que Galicia, malia o seu atraso e ruralismo, tamén empeza a estar afectada pola propagación do capitalismo e polos seus problemas sociais específicos. Nun artigo dedicado á cuestión obreira en Galicia (1893), feito insólito na prensa rexionalista, mestura unha afinada análise da situación do proletariado europeo con criterios organicistas á hora de aplicala a Galicia. Logo de recoñecela pouquidade da industria no país por mor do seu atraso, afirma que a ?cuestión social? en Galicia, e concretamente a