92
BOLETÍN DA REAL ACADEMIA GALEGA
una vida común consciente y continuada durante siglos, puede hacer de una región ?haya sido o no independiente? una nación cuya vida nadie puede anular ya por entero.
É difícil atopar unha confesión máis paladina de organicismo e historicismo no concepto xeral de nación e unha minusvaloración tan grande dos factores políticoestructurais e da vontade dos individuos na configuración dun ente nacional. Moi influído polo impacto teórico que, dende a difusión das obras de Darwin, Spencer e Gobineau, tiñan en toda Europa tanto o evolucionismo como o determinismo biolóxico e xeográfico, Murguía compara explicitamente as nacións e ?rexións? con organismos vivos que loitan pola súa supervivencia (1886c). E consecuentemente concédelle á raza a preeminencia entre os factores xeradores da nación, de modo que son principalmente as diferencias raciais as que explican os caracteres diversos dos pobos e os seus antagonismos, pois ?se conservan en las razas tanto los rasgos morales como los físicos? (1899a, p. 44), polo que ?en la literatura el genio de cada raza aparece en toda su plenitud? (1886c). E así, falando dos contrastes que observa entre os habitantes do Norte e do Sur de Portugal, di: ?¿Y será todavía necesario advertir que esas diferencias, más o menos acusadas, indican conflicto entre dos pueblos de sangre y origen distintos, superior y ariano el uno, semita é inferior el otro?? (1889a, p. 45). E pensa que a raza, non só determina o carácter de cada pobo senón con este as súas inclinacións sociopolíticas. Xa o vimos nos seus comentarios de 1879 verbo da I República española. No seu discurso de 1886 insiste no mesmo cando contrapón o negativo ?instinto comunista? dos pobos ?africanos? (no sentido de semitas) da España meridional ó positivo ?espíritu individualista? dos pobos europeos (no sentido de arios) do norte da Península. Aínda que recoñece a importancia do idioma e proclama que ?las lenguas son las verdaderas banderas nacionales? (1886c), non deixa de subordinar este elemento á raza e por iso aduce o caso de ingleses e irlandeses (1889a, p. 12) para demostrar que os antagonismos étnicos persisten mesmo cando a lingua deixa de ser un factor de diferenciación. En suma, e como manifestará aínda con máis claridade cando aplique estas ideas a Galicia, para el é nación toda comunidade na que se dan simulta